Ааспыт сылга быыһааччылар 1700 киһини быыһаабыттар

Сыл устата Саха сирин быыһааччылара 1700 киһи олоҕун быыһаатылар. Ахсынньы 27 күнүгэр, Быыһааччы күнүгэр, кинилэри премьер Кирилл Бычков эҕэрдэлээтэ. 

Нэһилиэнньэ олоҕор куттала суох буолууну хааччыйыы миниистирэ Дмитрий Лепчиков этэринэн, быыһааччылар түмсүүлээх, чуолкай дьайыыларынан уонунан ыксаллаах балаһыанньалары, ол иһигэр техногеннай да, айылҕа да  таһаарбыт саахалларын туораттылар.

Быыһааччы күнүн бэлиэтиир үөрүүлээх тэрээһиҥҥэ кэккэҕэ саҥа киирбит, аттестацияны ааспыт дьон андаҕар тылын эттилэр уонна быыһааччы дастабырыанньатын туттулар. Норуоттар икки ардыларынааҕы кылаастаах быыһааччы, СӨ үтүөлээх быыһааччыта Василий Павлов андаҕар тылын аахпытын, күргүөмүнэн үтүгүннүлэр.