Ааспыт үйэ 40-с сыллардааҕы хаартыската: Лапсаны хатарыы

1940-с сыллар. Бу хаартыска ыалдьыттар болҕомтолорун мэлдьи тардар. Мокоруону оҥорор фабрика Дьокуускайга Аҕа дойду Улуу сэриитин сылларыгар – 1941 сыл алтынньы 20 күнүгэр – аһыллыбыта.

Фабриканы Воронежскай уобаластан төрүттээх, 22 саастаах Николай Иванович Левов тэрийбитэ. 1939 сыл от ыйыгар кини Дьокуускайга «технолог мукомольно-крупяной промышленности» диэн сэдэх идэлээх эдэр исписэлиис быһыытынан кэлбитэ.

Бастаан кинини Саха АССР аһылык бырамыысыланнаһын наркоматын технолог-бурдугу тардааччы быһыытынан анаабыттара, онно тута куорат миэлиҥсэтигэр куруппа сыаҕын тэрийиигэ көхтөөхтүк кыттыбыта.

1941 сыл сааһыгар Дьокуускайга мокоруон оҥорууну саҕалыырга быһаарбыттар, Левовы идэтин үрдэтэр кууруска ыыппыттара уонна таарыйа ону оҥорор тэриллэри атыылаһарга соруйбуттара. 1941 сыл атырдьах ыйыгар Мокоруон фабрикатын таҥан барбыта. Үлэһит илии тиийбэтин, сырьё да мөлтөхтүк кэлэрин үрдүнэн,  1943 сыл кулун тутарыгар оҥорон таһаарыы сууккаҕа 1,8 туоннаҕа тиийбитэ.

«Якутск – город трудовой доблести» быыстапкаҕа куорат устуоруйатын туһунан өссө атын интэриэһинэй чахчылары билиэххэ сөп диэн Дьокуускай куорат устуоруйатын түмэлэ суруйар.