Аатын ааттыан баҕарбатах кэллиэксийэньиэр быыстапката

Бу күннэргэ Дьокуускайга М.Ф. Габышев аатынан омук дойдуларын ускуустубаларын галереятыгар «Кырдьаҕас маастар кэпсээннэрэ. Чааһынай кэлиэксийэттэн Ян Йозеф Хореманс. XVIII үйэ саҕаланыытын Фландрия кыраасканан суруллубут хартыыната (живопись) уонна графиката” быыстапка үлэтин саҕалаата.

Бу 18-с үйэҕэ олорбут фламандскай худуоһунньук, Антверпен Сибэтиэй Лука гильдиятын маастара Ян Йозеф Хореманс үлэлэрин ураты быыстапката.

Аан дойдуга саамай былыргы бөдөҥ маастар хомуурунньугун хартыыналарын Дьокуускай олохтооҕо, чааһынай кэллиэксийэньиэр (аата ааттаныан баҕарбат эбит) 2013 сылтан ыла уонтан тахса сыл устата көрдөөн, биир-биир атыылаһан испит. Кини түмэл үлэһиттэрин кытта  сыл саҥатыгар билсэн, мунньубут хартыыната 80-тан тахсаҕа тиийбит, Хореманс хартыынатын быыстапкаҕа туруорарга этии киллэрбит.

“Бу уопсайа сүүсчэкэ олус сэдэх үлэлэр. Ону тэҥэ, өрөспүүбүлүкэ ойуулуур-дьүһүннүүр уус-уран түмэлин пуондаларыттан эспэнээттэри киллэрэн биэрдибит. Живописец уонна уруһуйдьут Ян Хореманс араас тиэхиньиичэскэй ньымалары  туттан, оччотооҕу олоҕу-дьаһаҕы хайдах баарынан ойуулаан көрдөрөр үлэлэрэ киһини 21-с үйэттэн 18-с үйэҕэ “көһөрөр” аптаах күүстээхтэр. Ол курдук, көрөөччүлэр 300 сыл анараа өттүгэр Фландрияҕа олоро сылдьыбыт дьону кытта лааппыга, эмтиэкэҕэ, оскуолаҕа эбэтэр уруу дьоро киэһэтигэр ыалдьыттаан ылыахтарын сөп”, — диэн М.Ф. Габышев аатынан омук дойдуларын ускуустубаларын галереятын отделын сэбиэдиссэйэ Вероника Егорова санаатын үллэһиннэ.

Быыстапка Петровскай уул., 4, балаҕан ыйын 14 күнүгэр диэри туруоҕа. Кэлиҥ, сылдьыҥ, көрүҥ, кэрэхсээҥ.