Аатырбыт Мукучуга уолаттарга улахан хапсаҕай турнира ыытыллыаҕа

Хапсаҕайдьыттарынан аатырар Мукучу сэлиэнньэтигэр олунньу 15 күнүгэр Кэбээйи оройуонун бириистэригэр уолаттарга өрөспүүбүлүкэтээҕи хапсаҕай турнира ыытыллыаҕа.

Көбүөргэ үс категория ыйааһыннарынан кэскиллээх спортсменнар тахсыахтара. Күрэхтэһиигэ 2007-2012 сс. төрүөх уолаттар киирсиэхтэрэ. Ыйааһыннарынан 40, 45, 50, 55, 62, 70 онтон 70-тан тахса киилэҕэ арахсан күөн көрсүөхтэрэ, ону таһынан бу ыйааһыннарынан абсолютнай чөмпүйүөн аата биллиэҕэ. Итини кытта көбүөргэ 2013 сыллааҕы уолаттар 30, 37, 43 киилэҕэ диэри ыйааһыҥҥа, итиэннэ 2014 сыллааҕы эдэр спортсменнар 30 уонна 35 киилэҕэ диэри ыйааһыҥҥа тахсыахтара. Күрэхтэһии олунньу 15 күнүттэн сарсыарда 11.00 чаастан саҕаланыаҕа уонна ити күн түмүктэниэҕэ.

Мукучуга элбэх биллэр хапсаҕайдьыттар иитиллэн тахсыбыттара. Хапсаҕайга оскуола выпускниктарынан аныгы кэм биллиилээх тустууктара Петр Максимов, Василий Попов, Кирилл Павлов, Петр Иванов, Петр Николаев, Иван Семёнов, Айсен Поскачин, о.д.а. буолаллар. Турнир Арассыыйаҕа Аҕа дойдуну көмүскээччи сылыгар, Улуу Кыайыы 80 сылыгар, Кэбээйи улууһугар Патриотизм сылыгар уонна анал байыаннай дьайыы кыттыылаахтарын хорсун быһыыларыгар ананан ыытыллар.