Аатырбыт скульптор Даши Намдаков айар үлэтин быыстапката саҕаланна

Бүгүҥҥүттэн, олунньу 7 күнүттэн,  СӨ Национальнай уус-уран түмэлигэр Арассыыйа художественнай академиятын чилиэн-кэрэспэдьиэнэ, Бурятия народнай худуоһунньуга, Арассыыйа бырабыыталыстыбатын бириэмийэтин лауреата, бурят норуот култууратын төрүттэрин, монгол норуотун эпическэй геройдарын туһунан историческай үһүйээннэри, Буддизм үһүйээннэрин кытта ситимнээх үлэлэрдээх аан дойду аатырбыт скульптора Даши Намдаков аатырбыт үлэлэрин быыстапката үлэтин саҕалаата. 

Аатырбыт скульпторы кытта Ил Дархан Айсен Николаев көрүстэ. “Аан дойдуга киэҥник биллэр скульптор уонна худуоһунньук айар үлэтэ — ураты эйгэ” диэн бэлиэтээн туран, Ил Дархан Даши Намдаковы култуура уонна ускуустуба сайдыытыгар кылаатын уонна үгүс сылларга таһаарыылаах үлэтин иһин Саха сирин Аҕа баһылыгын Кыраамататынан наҕараадалаата.

Хаартыска: Андрей Сорокин түһэриитэ. 

Забайкальеттан төрүттээх аатырбыт скульпторы кытта бэҕэһээ, олунньу 6 күнүгэр, суруналыыстар көрүстүлэр.

Даши Намдаков суруналыыстарга бэйэтин айымныьыларын уратыларын билиһиннэрдэ. Кырдьык, сиһилии билистэххэ, скульптор айымньылара персонажтар хамсаныыларын бэрт мындырдык чочуллан оҥоһуллубуттар. Субу буола турар түгэн оннук чопчутук көстөр эбит.  «Бу Красноярскайдааҕы судаарыстыбаннай художественнай институкка (скульптор-академик Л.Н. Головницкай мастарыскыайа) идэҕэ үөрэтии таһымын көстүүтэ» диэн бэлиэтээтэ Даши Намдаков.

Эдэр скульптор үлэлэрин бастакы быыстапкаларын 2000-с сыллартан саҕалаабыт.  2001 сыллаахха Даши Намдаков Арассыыйа худуоһунньуктарын сойууһун Иркутскайдааҕы салаатыгар ылыллыбыт.  Байкал эрэгийэнин ускуустубатыгар  кини аата дорҕоонноохтук аатанан барбыт.  Онтон Санкт-Петербурга уонна Москваҕа ыытыллыбыт быыстапкаларга Арассыыйа худуоһунньуктарын академигын аатын ылбыт, кэлин Искусстволар Академияларын толору чилиэнинэн ылыллыбыт.

Даши Намдаков үлэлэрин билигин Судаарыстыбаннай Третьяков галереятыгар, Судаарыстыбаннай Эрмитаж мусуойугар, Судаарыстыбаннай историческай түмэлгэ, ону тэҥэ Кытай, Финляндия, АХШ уонна Италия мусуойдарын быыстапкаларыгар көрүөххэ сөп.  Маны тэҥэ,  скульптор үлэлэрин Санкт-Петербургтааҕы Арассыыйа этнографическай , Илиҥҥи искусство, Москватааҕы Аныгы ускуустуба, аан дойду үгүс дойдуларын мусуойдарыгар, ол иһигэр Тибет дьиэтигэр (Нью-Йорк) уонна Артхоут мусуойугар (Кытай) быыстапкаҕа туруораллар. Даши Намдаков айымньытыгар ордук кини монументальнай айымньылара: “Ханшайм” (Казахстан), “Золотая Шория” (Кемеровскай уобалас), “Казань” (Татарстан), “Королевская охота” (Тыва Өрөспүүбүлүкэтэ), Иркутскай уобаласка “Хранитель Байкала”, Красноярскайга “Преобразование”  биллэллэр.

Даши Намдаковы кытта көрсүбүт суруналыыстар кини үлэлэрин чугастык билэллэриттэн олус сөхтө уонна үөрдэ: «кырдьык, эһиги бэлиэтээбиккит курдук, мин скульптураларым тиэмэлэрэ «мифологическайдар», истиилим былыргы пластическай тиэхиньикэҕэ олоҕурар. Ускуустубаны олус сэргиир эбиккит, онон миигин бэркэ үөртүгүт», — диэн бэлиэтээтэ Даши Намдаков.

СӨ Национальнай художественнай түмэлигэр Арассыыйа художественнай академиятын чилиэн-кэрэспэдьиэнэ, скульптор Даши Намдаков быыстапката балаҕан ыйын 14 күнүгэр диэри ыытыллыаҕа.