Абый олохтооҕо араҕас арбузтары үүннэрэр

Абый улууһун олохтооҕо, элбэх оҕолоох ийэ Изабелла Садовникова ураты арбуһу үүннэрэн, дьон биһириэбилин ылыан ылла. Кини уола бу туһунан научнай үлэни суруйар.

Изабелла хоту дойдуга оҕуруот аһын арааһын үүннэрэр. Быйыл араҕас арбуһу үүннэрэн көрбүт диэн СИА суруйар.

— Дьон соһуйар да, дьиҥэ, Арассыыйаҕа араҕас арбуз киэҥник тарҕаммыт суорт ээ. Арбузтары сэттис сылын үүннэрэбин. Ыам ыйыгар олрдобун, күһүн бары астарын биэрэллэр, ситэллэр. Быйыл «Сюрприз» диэн араҕас арбуһу үүннэрэн көрдүм. Үчүгэйдик ситтэ, амтанын сөбүлээтибит. Былырыын уолум Кирилл икки арбуз суордун тэҥнээн көрөр үлэни ыытан, научнай-чинчийэр кэмпириэнсийэҕэ кыттыбыта. Быйыл саҥа суордун туһунан үлэни суруйуо, — диэн оҕуруотчут «Абый улууһун сонуннарыгар» кэпсээтэ.

Хоту улууска оҕуруот аһын үүннэрэр уустуга өйдөнөр. Ол да буоллар, хоту дойду хоһуун дьонун сатабыллара, үлэһиттэрэ, үөрүйэхтэрэ сөхтөрөр.