Абыйдар байыаннай эпэрээссийэҕэ кыттар биир дойдулаахтарыгар көмөлөһөллөр

Ыраах Абый улууһун олохтоохторо анал байыаннай эпэрээссийэҕэ сылдьар биир дойдулаахтарбытыгар көмөнү, өйөбүлү оҥорууга ис сүрэхтэриттэн кыһаллан, кыттыһа олороллор.

Ол туһунан «Мы вместе» уопсастыбаннай хамсааһын штабын бэрэссэдээтэлэ, улуус үөрэхтээһиҥҥэ управлениетын начаалынньыгын эбээһинэһин толорооччу Айталина Алексеевна Унарова кэпсээтэ:

— Биһиги Абыйбыт улууһа быстах ыҥырыынан анал байыаннай эпэрээссийэҕэ кытта сылдьар биир дойдулаахтарбытыгар анаан 1 826 469 солкуобайдаах матырыйаалынай көмөнү оҥордо. Харчы хомуйуутугар «Своих не бросаем» диэн аахсыйанан кэккэ тэрээһиннэри (кэнсиэртэри, дьаарбаҥкалары) ыыппыппыт. Анал байыаннай эпэрээссийэҕэ кытта барбыт дьоммут дьиэ кэргэттэригэр барыларыгар кыһын иһэр ууларыгар муус ылан биэрии үлэлэрэ барбыттара.

Байыаннай сулуспалаахтар дьиэ кэргэттэригэр туох көмө наадатын быһаарсыыга быһа кэпсэтиилэри ыытан билсэ олоробут. Ол курдук болҕомто киинигэр маннык боппуоруостар тураллар:

— саллааттарга хамнастара кэмигэр киириитэ;
— байыаннай сулууспалаахтар дьиэ кэргэттэригэр биир кэмнээх харчынан көмө кэмигэр төлөнүүтэ;
— байыаннай сулууспалаахтар дьиэ кэргэттэрэ култуура ыытар тэрээһиннэригэр босхо сылдьыылара;
— байыаннай сулууспалаахтар дьиэ кэргэттэригэр уйулҕа чөл буолуутугар туһуламмыт көмөнү оҥоруу;
— байыаннай сулууспалаахтар оҕолорун оҕо саадыгар босхо сырытыннарыы, оскуолаҕа босхо аһатыы уо.д.а.

Ураһалаах нэһилиэгиттэн анал байыаннай эпэрээссийэ кыттыылааҕа, байыаннай сулууспалаах  Дмитрий Сергеевич Степановы чиэстээһин, киниэхэ нэһилиэк бочуоттаах олохтооҕо бэлиэни туттарыы сиэрэ-туома ыытыллыбыта.

Улуустан саллааттарга анаан сылаас таҥас хомуллан, саллааттарга оҕолор суруктарын кытта холбуу Дьокуускайга тутар пууҥҥа ыытыллыбыта. Маны улууспут уопсастыбаннай диэйэтэлэ Евгения Ефимова уонна улуустааҕы оҕо хамсааһына кыттыһан тэрийдилэр.

Майор нэһилиэгэр:

— олохтоох дьаһалта, улуустааҕы «#МЫ ВМЕСТЕ» штаб быстах ыҥырыынан сулууспалыы сылдьар саллаат кэргэнигэр Дьокуускай – Белай Гора айанын төлөөн көмөлөспүттэрэ;
— быстах ыҥырыынан сулууспалыы сылдьар саллаат быраата Дьокуускайга инбэлиит оҕолор реабилитационнай кииннэригэр барарыгар көмө оҥоһуллубута;
— быстах ыҥырыынан сулууспалыы сылдьар саллаат оҕото Москваҕа ыытыллыбыт Бүтүн Арассыыйатааҕы айар куонкуруска кытта барыытыгар үбүнэн көмө оҥоһуллубута.

Белай Гораҕа:

— Белай Гораҕа баар «Саханефтегазсбыт» АО филиала быстах ыҥырыынан сулууспалыы сылдьар саллаат дьиэтин хосторугар саҥа ааннары туруоран биэрэн көмөлөспүтэ;
— Саллааттар дьиэ кэргэттэригэр олохтоох урбаанньыттар көмөлөрүнэн 15 көрүҥ ас бородууктата тиксэриллибитэ;
— Саллааттар оҕолоругар Абый улууһун салайааччылара, биир дойдулаахтар уонна штаб бэйэлэрин үүммүт сылынан эҕэрдэлээн туран, Саҥа дьыллааҕы бэлэхтэрин туттарбыттара, «Амарах санаа харыйата” аахсыйаҕа элбэх киһи кытынна;

— 15 саллаат дьиэ кэргэнигэр Абый улууһун дьаһалтата улуустааҕы «Хотугу кыым» хаһыакка сурутуунан көмөлөстө;
— нэһилиэк дьаһалтата саллаат дьиэтин муостата сылаас буоларын хааччыйар үлэни ыытта.

Онон биһиэхэ, ыраах Абыйга, улууспут олохтоохторо анал байыаннай эпэрээссийэҕэ сылдьар биир дойдулаахтарбытыгар көмөнү, өйөбүлү оҥорууга ис сүрэхтэриттэн кыһаллан, кыттыһа олороллор.