Абыйга быыһааччылар бөлөхтөрө барыаҕа

Билигин уустук балаһыанньалаах Абый оройуонугар эбии баһаарынайдар уонна быыһааччылар барыахтара. Бу туһунан бырабыыталыстыба бэрэссэдээтэлин бастакы солбуйааччы Дмитрий Садовников иһитиннэрдэ.

Бу иннинэ Ил Дархан сорудаҕынан Быыһыыр сулууспа 10 быыһааччыта, Баһаарынай сулууспа 5 баһаарынайа уонна ЫБММ авиамобильнай бөлөҕө барбыттара.

Зырянкаттан «Якутлесресурс» судаарыстыбаннай тэрилтэ 5 үлэһитин уонна «Авиалесоохрана» 6 үлэһитин, ол иһигэр кэтээн көрөөччү летчигын илдьэ, «Полярные авиалинии» хампаанньа рейсэ көтөн тиийдэ. Маны таһынан, өрөспүүбүлүкэ киин куоратыттан Белай Гораҕа диэри Арассыыйа ЫБММ ууну түһэрэр тэриллээх Ми-8 МТВ сөмөлүөтэ  көтөр, федеральнай управлениеттан эбии 5 быыһааччыны тиэрдиэҕэ.

“Учаастак үлэтин нэһилиэнньэҕэ куттал суох буолуутун хааччыйыы миниистирэ Дмитрий Лепчиков салайар. Ойуур баһаара билигин Белай Гора сэлиэнньэтиттэн 10 км курдук тэйиччи баар. Сэлиэнньэ өттүттэн уоту тохтотор лииньийэни оҥорууга үлэ салҕанар. “Арктика суоллара” тэрилтэ тиэхиньикэтэ үлэҕэ кыттыста”, — диэн бэрэссэдээтэли бастакы солбуйааччы иһитиннэрдэ.

Хоту  сөҥүүтэ суох, итии күн-дьыл турар эбит буоллаҕына, өрөспүүбүлүкэ киин өттүгэр, соҕуруулуу-илҥҥи уонна соҕурууҥҥу улуустарга ардах түстэ. Сөҥүү түспүтүнэн, Алдан уонна Нерюнгри улуустарыгар балаһыанньа туруктаах буолла. Уус Маайаҕа уонна Ленскэйгэ эмиэ балаһыанньа тубуста.

Өлүөхүмэ улууһугар эмиэ сөҥүү түстэ, ол гынан баран, былыттаах буолан, баһаардары үөһээттэн бэрэбиэркэлиир кыах билиҥҥитэ суох. Бүгүн сөмөлүөт көтөр усулуобуйата үөскээтэ. Садовников этэринэн, бастакы сорук быһыытынан 10-тан тахса киһини, ол иһигэр Саха сирин Быыһыыр сулууспатын быыһааччыларын, Тээнэ нэһилиэгин аттыгар баар баһаарга тиэрдии буолар.

Ыарахан балаһыанньа, Абый уонна Өлүөхүмэ улуустарыттан ураты, Үөһээ Бүлүү улууһугар баар. 7  баһаартан 4 күүстээх тыалтан мас үөһэтинэн барбыт. Бүлүү бөлөх оройуоннарыгар  сөҥүүнү түһэрэр туһугар зондировщик сөмөлүөт көппүтэ.

От ыйын 17 күнүгэр  169 ойуур баһаара уонна 2 ландшафтнай баһаар умайар. Итинтэн 9 баһаар бохсуллубут. Өрөспүүбүлүкэ үрдүнэн баһаары умуруорууга 1940 киһи уонна 151 тиэхиньикэ үлэлиир. 16 сөмөлүөт авиаботуруулга, 13 сөмөлүөт уоту умуруорууга үлэлии сылдьаллар. Бэҕэһээ Өлүөхүмэ улууһугар зондировщик сөмөлүөт үлэлээбитэ, оттон бүгүн Бүлүү бөлөх оройуоннарыгар  сөҥүүнү түһэриигэ үлэ барара былааннанар.