Абыйга куһу-хааһы бултааһыҥҥа 20-чэ киһи көҥүл ылла

Абый улууһугар бу күннэргэ куһу, хааһы, хабдьыны бултааһыҥҥа көҥүлү биэрэ олороллор. Судаарыстыба экологияҕа кэтэбилин Абыйдааҕы иниспиэксийэтин ыстаарсай судаарыстыбаннай иниспиэктэрэ Александр Новиков этэринэн, билиҥҥи туругунан, 20-чэ киһи ылбыт.

Бу көҥүлү 20 хонук иһинэн төттөрү туттарыахтаахтар. Хас биирдии булчут аата-суола, докумуона бырагыраамаҕа киирэ сылдьар, хаһан көҥүлү ылбыта учуоттанар.

— Ыраах нэһилиэктэрбит олохтоохторо, холобура, Сыаганнаах, Уолбут эҥин нэһилиэктэр булчуттара биһиэхэ  электроннай көрүҥүнэн, бассаабынан да бу көҥүлү ылыыга сайабылыанньа суруйаллар. Хайаан даҕаны түһээни төлөөбүттэрин туһунан докумуоннарын ыытыахтаахтар, — диир Александр Иванович.

Ыраах суоллаах-иистээх нэһилиэктэри кытта итинник үлэлииллэрэ үчүгэй эбит.

Хаартысканы: А.Новиков ыытта.