Абыйга таба иитэр төрүт дьарыгы сөргүтэллэр

Абый улууһа өрүү табаны иитиинэн утумнаахтык дьарыктанар. Урут Кэбэргэнэ диэн национальнай нэһилиэккэ  хас да таба иитэр хаһаайыстыба баара. 1990 сыллартан таба ахсаана ачаатар-аччаан, билигин онно 40 төбө табалаах биир эрэ хаһаайыстыба баар.

«Билигин манна табаны иитиини сөргүтэр бырайыак үлэлээн эрэр. Ол курдук Тыа хаһаайыстыбатын министиэристибэтин чэрчитинэн, Усуйаана улууһуттан былырыын табалары атыылаһан Иван Слепцов диэн киһиэхэ тиэрдибиппит. Чааһынай тэрилтэлээх Иван Слепцов бары тэрээһин үлэтин ыытта. Салгыы сайыннарар санаалаах. Өрөспүүбүлүкэ бырабыыталыстыбата киниэхэ күүс-көмө буолуоҕа», — диэн арктиканы сайыннарыыга уонна хотугу норуоттар дьыалаларыгар миниистирин солбуйааччы Михаил Погодаев иһитиннэрэр.

Кини этэринэн, бүгүҥҥү күҥҥэ Иван Слепцов ыстаада тэринэригэр табатын ахсаанын 1200 төбөҕө тиэрдиэн наада.  Бырайыак кэскиллээҕинэн сибээстээн, тыа хаһаайыстыбатын министиэристибэтэ киниэхэ эбии төбөлөрү биэриэн сөп.

«Усуйаана уонна Абый улуустара килиимэттэрин усулуобуйатынан майгыннаһаллар. Сөптөөхтүк дьаһаннахха, бырайыак улахан инникилээх буолар. Онон  бу киһини салгыы өйүөххэ наада», — диэн этэр Михаил Погодаев.

Маны сэргэ, табаны таһынан Слепцов хаһаайыстыбатыгар 90 ынахтаах,  70 сылгылаах. 2015 сыллаахха Слепцов «Дьиэ кэргэн пиэрмэтэ» диэн бырагыраамаҕа кыттан, 3 мөлүйүөн солк. суумалаах судаарыстыба өйөбүлүн ылан улахан хотон туттубут. Бу бырагыраама чэрчитинэн былырыын киниэхэ тиэхиньикэ атыылаһарыгар 5 мөлүйүөн солкуобай көрүллүбүт. Онон Иван Слепцов эти, үүтү Абый улууһун олохтоохторугар хото атыылыы олорор.

Аны билигин табаны иитиинэн дьарыктанар киһиэхэ тоҥуу хаартан иҥнибэт тиэхиньикэ наада.  Тоҕо диэтэххэ, табалар Усуйаана улууһуттан чугас, Абыйтан ыраах сиргэ сылдьаллар. Инньэ гынан Иван Слепцов ситэриилээх былаас отчуоттуу кэлбитигэр инньэ көрдөһүүлээх буолбут.

Тыа хаһаайыстыбатын министиэристибэтин иһинэн хотугу норуоттар үгэс буолбут салааларын  уонна балык хаһаайыстыбатын комплексын сайыннарар салаа салайааччыта Иннокентий Баланов  Иван Слепцовка судаарыстыба өйөбүлүн туһанарга Арасыыйа үрдүнэн аҕыйах ахсааннаах хотугу норуоттар төрүт дьарыктарын чэрчитинэн ыытыллар бырагыраама куонкуруһугар кыттарыгар сүбэлээтэ. Бырагыраама чэрчитинэн судаарыстыба бүддьүөтүттэн тиэхиньикэни атыылаһарга үп-харчы ороскуота толуйуллар диэн быһаарда.
Бэлиэтээн суруйдахха, бүгүҥҥү күҥҥэ Саха сирэ дойду үрдүнэн таба иитиитигэр үһүс миэстэҕэ турар. Өрөспүүбүлүкэҕэ уопсайа 20 оройуоҥҥа таба иитэллэр.  Таба иитэр 111 хаһаайыстыбаҕа уопсайа 1200 киһи үлэлиир.

Ааспыт сылтан  Ил Дархан дьаһалынан таба төбөтүгэр субсидияны 4995  солкуобайга диэри үрдэппиттэрэ.  Бу сылга табанан дьарыктанааччыларга өйөбүл баар буолан, таба төбөтүгэр субсидия 5335 солкуобайга үрдүөҕэ диэн Ил Дархан эрдэ иһитиннэрбитэ. Маны таһынан «Эдэр табаһыт» диэн бырагыраама чэрчитинэн, бу хайысхаҕа түөрт сылтан кырата суох үлэлээбит эдэр дьон 1 мөлүйүөн солкуобайы хоту сиргэ дьиэ тутталларыгар туһаныахтарын сөп. Бу бырагырааманы сүүрбэттэн тахса эдэр табаһыт туһаммыт.

Табаны иитиигэ, үксэтиигэ тустаах бырайыак салгыы үлэлиэҕэ.