«Аччыгый баһаар» ырыынагар олохтоох хортуоппуй лааппыта аһылынна

РФ Бэрэсидьиэнэ Владимир Путин быһа эпииргэ дойду биисинэһин сайдыытыгар үлэлиир урбаанньыттарга махталын тиэрдибитэ.

— Биисинэс эйгэтэ маннык уустук кэмҥэ бэрт эппиэтинэстээҕин көрдөрдө: үлэ кэлэктииптэрэ бөҕөргөөн биэрдилэр, табаары уонна бородууксуйаны илдьии-тиэрдии саҥа хайысхаларын  тобуллулар,  бииртэн биир саҥа бырайыактары олоххо киллэрэн иһэллэр, — диэн бэлиэтээбитэ дойду баһылыга.

Бэрэсидьиэн Владимир Путин бу этиитин киин куорат «Аччыгый баһаар» ырыынагын бүгүҥҥү үлэтэ бигэргэттэ. Манна бэйэ бородууксуйатын оҥорон таһаарар 29 урбаанньыт эт-үүт, балык, оҕуруот аһын батарар «туочукалары» аспыттар. Бүгүн өссө икки маннык атыы пууна аһылынна. Онтон биирдэстэрэ — өрөспүүбүлүкэҕэ биллэр оҕуруоччут Сергей Латышев олохтоох хортуоппуй атыылыыр лааппыта.

Бу туһунан олохтоох бородууксуйаны батарар «Аччыгый ырыынак» салайааччыта Дмитрий Громов санаатын маннык үллэһиннэ:

Тоҕо  тыа сирин урбаанньыттара бородууксуйаларын «Аччыгый баһаар» ырыынагын нөҥүө батарарга  быһаарыннылар?

«Аччыгый ырыынак» кэлиҥҥи сылларга биллэ кэҥээтэ. Бииртэн биир сонун маҕаһыын аһыллан иһэр.

Кыра дьоҕус хосторго сибиэһэй эт арааһа дэлэй.

Балык туһунан киһи этэ барбат — сибиэһэйиттэн «медальон» диэн минньигэс кырбастарга тиийэ.

Ыыһаммыт балык — ырыынак «хоруола» буоллаҕа.

Дойду баһылыга «эрэгийиэн брендин сайыннарар сорук турар» диэн быһа эпииргэ этиэҕиттэн ыла, оҥорон таһаарааччылар урут ыйанан турар ааттарыгар- суолларыгар суолта биэрбэт бэйэм, билигин анаан тохтоон туран үөрэтэр буоллум.

Балыксыттар бородууксуйаларын холодильнигын үрдүгэр балык хайдахтаах курдук эрэйинэн балыктанарын хаартысканан кэпсиир истиэндэлэрэ киһи болҕомтотун тардар.

Маны таһынан, кыайыыларын уонна ситиһиилэрин кэпсиир долбуурга киһи хараҕын эмиэ «хатаан» ылар.

Ырыынак атыылыыр пууннарын кэпсии сылдьан, «Аччыгый баһаар»  салайааччыта  Дмитрий Громов «ырыынак ортотугар бу ураһаны анаан туттарбытым олуһун абыраата. Бу эти, балыгы анаан атыылыыр сирбит», — диэн бэлиэтээтэ. Онуоха эргиллэн көрбүтүм, илин диэкиттэн бу ырыынагы ураһа, остуруок уонна  Таҥара дьиэтэ анаан араҥаччылыы турар эбиттэр. Кырдьык, ураты дьикти көстүү!

Ити курдук, баҕа санааларын олоххо киллэрэн, хотуттан-соҕурууттан   тыа сирин урбаанньыттара РФ Бэрэсидьиэнэ Владимир Путин эппитинии, «бииртэн биир саҥа бырайыактары олоххо киллэрэн иһэллэр».