Доруобуйаларыгар хааччахтаах оҕолорго аналлаах үөрэх комплексын сыл бүтүүтэ үлэҕэ киллэриэхтэрэ

Дьокуускайга доруобуйаларыгар хааччахтаах оҕолорго үөрэх комплекса тутуллар. Быйыл сыл бүтүөр диэри бу Арассыыйаҕа ураты адаптивнай комплексы тутан бүтэрэн үлэҕэ киллэрэр соруктаахтар.

Бу туһунан СӨ Бырабыыталыстыбатын Бэрэссэдээтэлин бастакы солбуйааччы  Дмитрий Садовников тутуу үлэтин-хамнаһын көрө-истэ сылдьан эттэ. Тутууга 130 киһи, 10 көлө үлэлиир. Билигин сирин-уотун оҥоруу, тупсарыы, тэрилтэ иһигэр үлэ, интэринээти тутуу ыытыллар.

—Комплекс икки түһүмэҕинэн үлэҕэ киириэ. Бастакы комплекска тэриллэри монтажтааһын, үлэҕэ киллэрэргэ бэлэмнээһин ыытыллар. Иккискэ интэринээт, уһуйаан киирэллэр. Үлэ-хамнас бара турар. Сыл бүтүөр диэри үлэҕэ киллэрэр былаан баар, — диэн этэр Дмитрий Садовников.

—Оскуоланы, интэринээти, уһуйааны тутуу былаан быһыытынан баран иһэр. Ол гынан баран, үп-харчы боппуруоһугар уустуктар бааллар. Бу боппуруос көрүллэ сылдьар, кэмигэр үбүлээһинтэн эбийиэк болдьоҕор киириитэ быһаччы тутулуктаах. Биһиги бу кыһалҕаны иккис кыбартаал бүтүүтүгэр быһаарарга суоттанабыт, — диэн бэлиэтиир кини.

Тутуу миниистирэ Виктор Романов бырайыакка туох баар ирдэбил учуоттанарын этэр.

—-Комплекс уратыта — доруобуйаларыгар хааччахтаах оҕолорго табыгастаах усулуобуйалаах буолуохтаах. Ол курдук, көрүдүөр киэҥиттэн саҕалаан, саалаҕа тиийэ бары ирдэбилгэ эппиэттиэхтээх. Манна оҕолор сылдьалларыгар табыгастаах буолуоҕа. Аттынааҕы сирэ-уота барыта тупсарыллан оҥоһуллуо, онтон тэрилтэ аныгы үйэ ирдэбилигэр толору эппиэттиир, оҕолор сайдалларыгар бары усулуобуйалаах буолара саарбахтаммат, — диир Виктор Романов.

Эбийиэги тутуу РФ Бэрэсидьиэнэ В.Путин көҕүлээбит «Үөрэх» национальнай бырайыагын иитинэн ыытыллар. 2025  сылтан бырайыак саҥа «Молодёжь и дети» уонна «Кадры» национальнай бырайыактар чэрчилэринэн салҕанар.

Санатар буоллахха, 2021  сыллаахха Дьокуускай куорат дьаһалтата Сэргэлээх шоссетыгар урукку 34 №-дээх коррекционнай оскуола миэстэтигэр икки тус-туспа оскуоланы — уопсай үөрэхтээһин уонна коррекционнай оскуолалары туттарарга быһаарбытын төрөппүттэр утарбыттара. Төрөппүттэри  СӨ Ил Дархана Айсен Николаев өйөөбүтэ.

Уопсайа 17  тыһ. тахса кв.м. иэннээх адаптивнай комплекс оҕолорго ананар. Комплекска профориентация хоһо былааннанар. Манна иистэнэргэ, уһанарга, туойунан оҥорорго, үүнээйини көрөргө-харайарга, парикмахер идэтигэр үөрэтиэхтэрэ, ону таһынан хаартыскаҕа түһэрэ үөрэниэхтэрэ.

СӨ Ил Дарханын уонна Бырабыыталыстыбатын пресс-сулууспата

Хаартыскаҕа: Саргын Скрябин түһэриитэ, СИА