Адмирал Виктор Федоров Саха сирин олохтоохторугар ыҥырыы сурук ыытта

2001-2007 сыллардаахха Чуумпу акыйааннааҕы флоту хамаандалаабыт адмирал Виктор Дмитриевич Федоров саха дьонугар анаабыт суругар, аныгы кэмҥэ устуоруйаны өйдүүр-саныыр уонна норуот сомоҕолоһуутун суолтатын бэлиэтээтэ.

Кини тыллара Арассыыйа уонна Саха сирэ көрсөр устуоруйа суолталаах кэрдиис кэмнэригэр уонна бүгүҥҥү ыҥырыыларыгар ананаллар. Адмирал бэлиэтээбитинэн, Аҕа дойду Улуу сэриитигэр Кыайыы 80 сыла – бу көннөрү даата буолбатах, дойду эйэлээх олоҕун уонна кэскилин туһугар олохторун толук уурбут дьоҥҥо ытыктабыл бэлиэтэ буолар:

«2025 сыл ыам ыйыгар биһиги дойдубут сүрүн бырааһынньыгын – Аҕа дойду Улуу сэриитигэр Кыайыы 80 сылын үөрүүлээх быһыыга-майгыга бэлиэтиибит. Итинэн биһиги буойуннарбыт сырдык кэриэстэригэр улуу ытыктабылбытын биэриэхпит…».

Кини бу устуоруйаны уларыта сатааһыннары уонна сомоҕолоһуу суолтатын болҕомтоҕо ылла: «Бу Улуу Кыайыыны арҕаа дойдулар устуоруйаны уларыта тутан, биһиги норуоппутуттан уора сатыыллар… Ол гынан баран, бу кинилэргэ кыаллыа суоҕа! Биһиги сомоҕобут —  кыайтарыыны билбэппит!» Адмирал Федоров санаатынан, сыл биир суолталаах түгэнинэн өрөспүүбүлүкэ сайдыытыгар сүҥкэн кылааты киллэрбит саха атыыһыта уонна мецената Филипп Иванович Лепчиков төрөөбүтэ 215 сыла буолар: «Кини Айаннааҕы суолунан сылгыны уонна ынах сүөһүнү үүрүүнү салайбыта… ол иһин Приморскай уобалас байыаннай губернаторын махталынан бэлиэтэммитэ». Ону таһынан, адмирал меценат уола Прокопий Филиппович Лепчиков тэрийбит дьаарбаҥкаларын уонна хотугу норуот туһунан уһулуччулаах тылларынан бэлиэтэммит генерал-губернатор Игнатьев кэлэ сылдьыбытын ыйда.

Адмирал Виктор Федоров 290-тан тахса сыл Чуумпу акыйааҥҥа тирэх буолан турар Охотскайдааҕы байыаннай порт суолтатын санатан эттэ: «Охотскайдааҕы байыаннай порт – Арассыыйа флотун Чуумпу акыйааҥҥа бастакы  үлэлиир байыаннай-муоратааҕы тутула», – уонна бүгүн Чуумпу акыйааннааҕы флот Арассыыйа Уһук Илиҥҥи кирбиилэрин эрэллээхтик харыстыырын  бэлиэтээтэ.

Түмүгэр адмирал Федоров саҥа көлүөнэлэргэ кынаттыыр уонна сомоҕолоһууга ыҥырар тылларынан туһаайда: «Онон, киин Арассыыйаттан төрүттээх Игнатьевтар аҕа уустарын уонна Саха сириттэн сыдьааннаах Лепчиковтар аҕа уустарын туох эрэ кистэлэҥ, кэмтэн-кэрдииттэн тутулуга суох уонна киһи эрэ барыта өйдүүр улуу иэйии – Ийэ дойдуга таптал ситимниир! Бүгүн эмиэ, байыаннай дьайыы ыытыллар кэмигэр, Арассыыйа саҥа көлүөнэлэрэ омуктарыттан уонна итэҕэллэриттэн тутулуга суох, биир соругунан сомоҕолоһон, фроҥҥа да, тыылга да, биһиги судаарыстыбабыт – Улуу Арассыыйа интэриэһигэр, байыаннай уонна үлэ соруктарын ситиһиилээхтик толороллор!». Бу туһунан sakha.gov.ru иһитиннэрэр.