Адыаччы орто оскуолатын кэлэктиибэ Саҥа дьыллааҕы флешмоб бэлэхтиир (ВИДЕО)

Үөһээ Дьааҥы улууһун В.С.Чириков аатынан Адыаччы орто оскуолатын кэлэктиибэ Саха сирин олохтоохторун, биир дойдулаахтарын, идэлээхтэрин Саҥа дьылынан флешмоб үҥкүүнэн эҕэрдэлиир.

Учуутал, тиэхэньиичэскэй үлэһит диэн арахса барбакка, эдэрдиин-эмэнниин бары биир киһи курдук кыттыбыттара флешмобу өссө киэргэтэр, кэлэктиип көхтөөҕүн, олоҕу кытта тэҥҥэ хардыылыырын туоһулуур.

Флешмоб ааптара, Адыаччыга “Земскэй учууталынан” тиийэн аангылыйа тылын үөрэтэр Оксана Бочарова бу курдук кэпсиир:

— Быйыл саас, сайын, күһүн уонна кыһын кэлэктиибинэн хаартыскаҕа түһүөххэ, үҥкүүтэ туруоруохха диэн былааннаммыппыт. Бу төрдүс бүтэһик үҥкүүбүт буолар. Уопсайынан, оскуола үлэһиттэрэ тыаҕа сынньанарбытын сөбүлүүбүт, бары бииргэ тутуспутунан сылдьабыт. Үөһээ Дьааҥы олус кырасыабай айылҕалаах улуус, дириҥ устуоруйалаах сирдэр бааллар.

Кэлэктиип олус көхтөөх. Учууталлар атын оскуолаларга педагогическай десант тэрийэбит, аһымал кэнсиэрдэри оҥоробут. Кэнсиэртэн киирбит үбү элбэх оҕолоох ыалларга көмө быһыытынан туттарабыт.

Кэлэн иһэр Саҥа дьылынан Саха сирин олохтоохторун ыраах Адыаччыттан эҕэрдэлиибит уонна кыһыҥҥы үҥкүүбүтүн бэлэх уунабыт!