Афанасий Андросов: “Тиксии бөһүөлэгэ уута суох хаалар куттала суох”

Булуҥ улууһугар оройуоннааҕы ыксаллаах быһыы-майгы биллэриллибит диэн сонун социальнай ситимнэргэ тарҕанна.

СИА суруйарынан, ЫБМ эрэсиимин киллэрии муниципалитекка водохранилище быһытыгар превентивнэй үлэлэри ыытыыга уонна бары суһал сулууспалары бэлэм оҥорорго туһуланар.  

Онон чуолкайдаһаары Булуҥ улууһун баһылыгын кытта төлөпүөнүнэн кэпсэттибит.

“Булуҥ улууһа” МТ баһылыга Афанасий Андросов үөскээбит балаһыанньанан маннык хоруйдаата:

— Санатар буоллахха, былырыын атырдьах ыйыгар бастакы харгыстар бэлиэтэммиттэрэ. Быһыппыт алдьана сыспыта. Онно тутатына ыксаллаах быһыыны-майгыны биллэрэн, чөлүгэр түһэрбиппит. Куппут буорбут тэстиини тохтоппотор даҕаны, улаханнык кыччаппыта. Урут Сэбиэскэй кэмҥэ “сезоннай-охлаждающай” тэрил диэни туруораллар эбит. Билиҥҥи туругунан эттэххэ, Тиксии бөһүөлэгэ уута суох хаалар куттала суох. Ол эрээри балаһыанньа мөлтөх соҕус диэххэ сөп. Былырыын даамбаны бэйэбит бас билиибитгэр оҥотторбуппут. Үлэни сыһыаннаах тэрилтэлэрбитин кытта ыыта сылдьабыт. Ол курдук, “СӨ ОДьКХ” ГУП олунньу ыйга матырыйаал (турба, көһө сылдьар ыстаансыйа)  аҕалыаҕа. Оччоҕуна өрөмүөн ыытыллыаҕа. Билигин бэдэрээтчит быһаарыллыахтаах. “Азимут” ХЭТ диэни сүбэлээбиттэрэ. “Гидропроект” тэрилтэ оҥорбут сметатыгар кыра уларытыылары киллэриэхтээх. Ол кэннэ “Азимуты” кытта кэпсэтиэхпит. Үүттүүр тэрил эҥин туруон наада. Бүгүҥҥү туругунан уу таһыма – 5,07 м.

Манна даҕатан эттэххэ, Экология министиэристибэтэ Тиксии бөһүөлэгин күөлүн туругун туһунан иһитиннэрии таһаарбыта. Онно этиллэринэн, тоҥорор ситим кыайан үлэлээбэт буолуоҕуттан, кэнники сылларга Булуҥ улууһун Тиксии бөһүөлэгин Мелкое күөл даамбатыттан уу тохтуута бэлиэтэнэр. Бу хранилищены “СӨ ОДьКХ” ГУП Булуҥнааҕы филиала үлэлэтэр, быһыт Булуҥ улууһун бас билиитигэр киирбитэ.

Манна даҕатан эттэххэ, СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ гидротэхиньиичэскэй тутуу куттала суох буолуутун хааччыйыыга көмөлөһөр. Онон  Дьокуускайга баар “Гидропроект” ХЭТ бырайыактыыр тэрилтэ ылыммыт тэхиньиичэскэй өттүнэн быһаарыытыгар олоҕуран, туһааннаах быһыкка экраннаах тоҥорор элеменнэри туруорууну ааҕыы-суоттааһын оҥоһуллубут.

Булуҥнааҕы экологияны судаарыстыбаннай кэтээн көрүүгэ иниспиэксийэтэ нэһилиэнньэҕэ ууну биэрии харгыстамматын туһугар Мелкое күөлгэ уу туругун кэтээн көрөр эбит. Тохсунньу 23 күнүгэр иниспиэксийэ салайааччыта Иннокентий Стручков Булуҥ улууһунааҕы ЫБМ үлэһитэ М.В.Прокопьевы кытта бу күөлгэ тиийэн уу таһымын бэрэбиэркэлээбиттэр.

Онон сыаналаатахха, сыһыаннаах тэрилтэлэр үөскээбит кыһалҕаны болҕомтоҕо ылбыттар.

Хаартыска: СИА