Хаартыска: "Айар" кинигэ кыһата
Тохсунньу 10 күнүгэр Саха Өрөспүүбүлүкэтин култууратын уонна духуобунаһын миниистирэ Афанасий Ноев “Айар” кинигэ кыһатын кэлэктиибин кытта көрүстэ.
«Айар» кинигэтэ кыһа урут Сыыппара уонна инновация министиэристибэтин иһинэн сылдьыбыт буоллаҕына, аны Култуура уонна духуобунай сайдыы министиэристибэтин көрүүтүгэр-истиитигэр 38-с тэрилтэнэн киирдэ.
Көрсүһүү кэмигэр Афанасий Ноев үлэ-хамнас хаамыытын билистэ, кыһалҕалары, этиилэри иһиттэ. Уус-уран литература, киэҥ араҥаҕа анаммыт, сакааһынан таһаарыылар эрэдээксийэлэрэ, үөрэх уонна оҕо таһаарыыларын киинэ уонна анал бырайыактары оҥорор салаалар салайааччылара үлэлэрин туһунан сиһилии билиһиннэрдилэр уонна инники бииргэ үлэлэһиигэ кэккэ этиилэри киллэрдилэр.
Көрсүһүүгэ этиллибитинэн, бэчээттэнэр кинигэ ахсаана сыл аайы аҕыйыыр, орто тираж 2000-ҕа тиийэ түспүт. Билиҥҥи уустук кэм усулуобуйатыгар тэрилтэ үлэтигэр баар кэккэ ыарахаттарга үрдүкү салалта өйөбүлэ улахан суолталаах.
“Эһиги “Бичиги” биһирэппит, «Айары» айбыт дьон буолаҕыт. Биһиги барыбыт сорукпут — эдэр ыччаппытыгар, кэлэр көлүөнэлэргэ төрөөбүт тылбытын чөл хаалларыы, кинилэри ааҕарга уһуйуу, көҕүлээһин. Онно эһиги оруолгут сүҥкэн. Классик суруйааччыларбыт айымньыларын элбэхтик бэчээттээн, дьоҥҥо-сэргэҕэ аахтарыаҕыҥ. Олоҥхолуур, тойуктуур идэни эдэр дьоҥҥо иҥэриэҕиҥ. Олоҥхону, тойугу оҕолорго үөрэтиэҕиҥ, онно даҕатан олоҥхолору тэттик кинигэ гынан тарҕатыаҕыҥ.
«Айар” национальнай кыһа – саха норуотун киэн туттуута, уус-уран тыл, айымньы сүмэтэ эһиэхэ кылаат буолан сытар. Бу баайы ускуустубаннай интэллиэги туһанан норуоппутугар тириэрдэргэ бииргэ үлэлэһиэҕиҥ. Арҕааҥҥы омуктары үтүктүбэккэ, бэйэҕит суолгутунан-иискитинэн сылдьыҥ, саҥаны айыҥ-тутуҥ. Бары бииргэ өйү-сүбэни, күүһү-кыаҕы түмэн үлэлиэҕиҥ, төһө кыалларынан өйүөхпүт», – диэн Афанасий Иванович санаатын эттэ.
СӨ култуураҕа уонна духуобунай сайдыыга миниистирэ Афанасий Ноев ону таһынан кинигэ кыһата бириэмэни кытары тэҥҥэ хардыылыырын – 2022 сылтан AyarBook мобильнай сыһыарыны үлэлэтэрин бэлиэтээтэ.
Кыһа сыалыгар-соругар сөп түбэһэр кэскиллээх кэпсэтииттэн, санааны үллэстииттэн, инники үлэни торумнааһынтан кыһа кэлэктиибэ сүргэтэ көтөҕүлүннэ.
(«Айар» кинигэ кыһата)
Сылын ахсын ыытыллар ыам ыйын 9 күнүгэр Аҕа дойду Улуу сэриитин Кыайыытын уһансыбыт буойуттар ааттарын…
– Хапытаалынай өрөмүөҥҥэ иэстээхтэри кытта хайдах үлэлэһэҕит? Суукка ыытаҕыт дуу? С.Алексеева. “СӨ Элбэх кыбартыыралаах дьиэлэри…
Саха сириттэн чэпчэки атлетикаҕа спортсменка Алена Татаринова Татарстааҥҥа ыытыллыбыт Арассыыйа чөмпүйэнээтигэр марафоҥҥа иккис миэстэни ылла.…
Ыам ыйын 6 күнүгэр Татарстаан өрөспүүбүлүкэтин киинигэр Казань куоракка «Казань оһуордара» оҕо уонна ыччат айар…
Бу күннэргэ оҕуруоччуттарга эппиэттээх кэм саҕаланна. Өлгөм үүнүүлээх оҕуруот аһын ылары ситиһэргэ кэмигэр уонна хаачыстыбалаах…
Михаил Мишустин Госдуумаҕа дойду бырабыыталыстыбатын бэрэссэдээтэлин солбуйааччыларын уонна федеральнай миниистирдэр дуоһунастарыгар кандидатуралары бигэргэтэргэ испииһэги киллэрдэ.…