Афанасий Ноев: «Олоҥхо дойдута! Тойук түөлбэтэ — Сунтаар!»

Сунтаар улууһугар бэс ыйын 20-21 күннэригэр  Сергей Зверев-Кыыл Уола төрөөбүтэ 125 сылыгар аналлаах ыһыах ыытылла турар.

Ыһыах иитинэн үгүс тэрээһиннэр ыытылла тураллар.

Бэҕэһээ  ыһыах аһыллыытыгар СӨ култууратын туйгуна, Саха сирин Дархан этээччитэ Евсеев Михаил Михайлович-Кураһаай Мэхээлэ Ыһыах алгыһын түһэрбитэ. Маны таһынан улуус олохтоохторо  үҥкүү түмсүүтүн үҥкүүһүттэрэ ыһыах аһыллыытын олус киэргэппиттэрэ.

СӨ култууратын уонна духуобунай сайдыытын миниистирэ Афанасий Ноев ыһыах күнүнэн эҕэрдэтин тириэртэ.

— Саха норуотун үҥкүүтүн култууратын маастара, норуот ырыаһыта, оһуохайы таһаарааччы, олоҥхоһут Сергей Зверев-Кыыл Уола төрөөбүтэ 125 сылыгар аналлаах өрөспүүбүлүкэтээҕи ыһыах   үрдүк таһымнаахтык ыытылла турар. Сунтаар ыһыаҕа, оһуохайа уруккуттан суон сураҕырар, аатырар, биллэр-көстөр. Сунтаардар ыһыахха сиэри-туому тутуһууга холобур буолаллар. Бу күн олус элбэх киһи Сунтаарга муһунна, — диэн санаатын үллэһиннэ.