Афанасий Владимиров: “Маннык этиилэри олох төрдүттэн суох гыныахха наада”

Дьокутаат Александр Иванов блогер Джем Кыраҥҥа биэрбит интервьюта дойду үрдүнэн сата баһын тарта. Биһиги дьон манна туох санаалааҕын ыйыттыбыт.  

Афанасий Владимиров, Ил Түмэн бэрэссэдээтэлин солбуйааччы:

— Норуот талбыт дьокутаата өрөспүүбүлүкэ, дойду иһинээҕи тыҥааһын, итэҕэйсибэт буолуу улаатыытыгар олук ууран, уопсастыба санаатыгар алдьатыылаах дьайыыны оҥороро сөбө суох.

Ил Түмэн бэрэссэдээтэлин солбуйааччы буоларым быһыытынан, мин Александр Иванов Арассыыйа холуонньалара көҥүл буолуохтаахтар диэн этэрин уонна Саха сирин Арассыыйа Федерациятыттан араарар санаатын быһаччы утарабын. Маннык этиилэри олох төрдүттэн суох гыныахха наада, тоҕо диэтэххэ уопсастыба иллээх-эйэлээх олоҕун төрүттэригэр маннык алдьатыылаах саба түһүүлэр биһиги уопсай сомоҕолоһуубутугар уонна биир санаалаах буолуубутугар улахан хоромньуну оҥороллор.

Кини биһиги өрөспүүбүлкэбитигэр атын көрүүлэри, идеологияны соҥноон, гражданскай ил-эйэ бириинсиптэрин эрэ кэспэт, эбиитин уопсастыба хайдыһыытыгар илдьэр. Кини кутталлаах луоһуннара, ыҥырыылара Арассыыйа эрэгийиэннэрин чиҥ туруктаах, биир санаалаах буолалларын мөлтөтөр.

Маннык сайабылыанньалар биирдиилээн түбэлтэ быһыытынан хаалалларыгар, өрөспүүбүлүкэ дьонугар-сэргэтигэр киэҥ өйөбүлү ылбатыгар эрэнэбин. Судаарыстыба биир сомоҕо, бүтүн оҥоруулаах буоларын өйөөһүн былаас уонна уопсастыба бэрэстэбиитэллэригэр барыларыгар биир бастакынан туруохтаах.