Афанасий Владимиров Төрүт сокуоҥҥа уларытыылары киллэриигэ аһаҕас истиилэр түмүгүн таһаарда

СӨ Төрүт сокууонугар уларытыылары уонна көннөрүүлэри киллэрии бырайыагынан аһаҕас истиилэр көхтөөхтүк буолан аастылар. Мунньахха 30-ча кыттааччы тыл эттэ.

СӨ Ил Түмэнин бэрэссэдээтэлин солбуйааччы Афанасий Владимиров бэлиэтээбитинэн, бу былаһаакка уопсастыба араас араҥатын санаатын истэргэ кыаҕы биэрдэ.

«Бэлитиичэскэй баартыйалар, уопсастыбаннай тэрилтэлэр, Идэлээх сойуустар хамсааһыннара, муниципальнай тэриллиилэр бэрэстэбиитэллэрэ тыл эттилэр. Өрөспүүбүлүкэ Төрүт сокуонугар көннөрүүлэри дьүүллэһии көхтөөхтүк барда. Ордук элбэх суругунан ыйытыы уонна этии киирдэ. Уопсайынан, аһаҕас истиилэр туһалаахтык аастылар, Ил Түмэн дьокутааттара нэһилиэнньэ санаатын иһиттилэр.

Төрүт сокуоҥҥа көннөрүүлэргэ сыһыаннаах эрэ буолбакка, тыа хаһаайыстыбата, бырамыысыланнас, үөрэхтээһин эйгэтигэр баар хас да кыһалҕа туһунан ыйытыылар киирдилэр», – диэн Владимиров хос быһаарда. Аһаҕас истиилэр түмүктэринэн Төрүт сокуон бырайыага өрөспүүбүлүкэ парламенын пленарнай мунньаҕар көрүллүөҕэ.