Аҕа дойду буойуннарын дьиэ кэргэттэрин кэмитиэтэ Үтүө дьыала марафонун тэрийэр

Сэтинньи 17-23 күннэригэр Аҕа дойду буойуннарын дьиэ кэргэттэрин кэмитиэтин бары эрэгийиэннээҕи ыстааптарыгар тэрилтэ тэриллибитэ үс сылыгар анаммыт «КСВО Үтүө дьыалатын марафона» диэн киэҥ далааһыннаах аахсыйа ыытыллар. Бу туһунан Саха сиринээҕи КСВО бастакы солбуйааччыта Альбина Винокурова иһитиннэрдэ.

«Биһиги кэмитиэппит сүрүн соруга – Аҕа дойду көмүскээччилэрин уонна кинилэр дьиэ кэргэттэрин өйүүр бары өрүттээх систиэмэни бөҕөргөтүү, итиэннэ байыаннай сулууспалаахтар кэргэттэрин уонна ийэлэрин бэйэ-бэйэҕэ көмөлөһүүлэрин сайыннарыы буолар. «КСВО Үтүө дьыалатын марафона» аахсыйа чэрчитинэн биһиги кэмитиэппит чилиэннэрэ өрөспүүбүлүкэ улуустарыгар буойуннарга анаан гуманитарнай көмөнү хомуйаллар, волонтерскай ыстааптарга, байыаннай сулууспалаахтар дьиэ кэргэттэригэр сылдьаллар, төгүрүк остуоллары, «КСВО чааһын» ыыталлар. Ону таһынан ыччаты, байыаннай дьайыы кыттыылаахтарын дьиэ кэргэттэрин кытта духуобунай үлэни ыытабыт», – диэн Альбина Винокурова бэлиэтээтэ.

Ааспыт үс сыл иһигэр Аҕа дойду буойуннарын дьиэ кэргэттэрин кэмитиэтин Дьокуускайдааҕы эрэгийиэннээҕи ыстааба улахан үлэни ыытта. КСВО салайааччыта уонна кыттааччылара күн аайы гражданнары кытта сирэй көрсүһүүлэри, ону тэҥэ онлайн-платформалар нөҥүө көрсүһүүлэри ыыталлар. Кыһалҕалаах боппуруостары быһаарыыга көмө оҥорорго кэмитиэт Telegram мессенджергэ чат-бот оҥорон таһаарда. Бу үлэҕэ толорор былаас уонна өрөспүүбүлүкэ олохтоох салайыныытын уорганнарын бэрэстэбиитэллэрэ көхтөөхтүк кытталлар. Билигин Аҕа дойду буойуннарын дьиэ кэргэттэрин кэмитиэтин Дьокуускайдааҕы эрэгийиэннээҕи ыстааба байыаннай сулууспалаахтары уонна кинилэр чугас дьоннорун өйүүргэ хас да бырайыактарынан уонна көҕүлээһиннэринэн көхтөөхтүк үлэлиир. Ол курдук, КСВО «КСВО чааһа», «Суолталаах туһунан кэпсэтиилэр», «СВОИ» медиа-бырайыак, «Преображение», «Харысхал» бырайыактары, «“Барыта Кыайыы туһугар!” волонтердара» бырагырааманы олоххо киллэрэр.

Сиһилии бу сигэнэн аах: https://www.sakha.gov.ru/news/15663