Аҕа дойду Дьоруойдарын күнүгэр «Нежность» ырыаҕа өйдөбүнньүк видеоклип уһулунна

Дойду култуурунай эйгэтигэр бэлиэ түгэн буолла – 1965 сыллаахха композитор Александра Пахмутова, поэттар Сергей Гребенников уонна Николай Добронравов суруйбут легендарнай «Нежность» ырыаларыгар өйдөбүнньүк видеоклибы оҥорууга «Улицы в лицах» норуоттар икки ардыларынааҕы патриотическай аахсыйа тэрийбит киэҥ хабааннаах патриотическай бырайыага түмүктэннэ.

Устуу Поклоннай хайаҕа Кыайыы түмэлин саалаларыгар, ускуустуба устуоруйаны кытта алтыһар, оттон муусука көлүөнэлэри ситимниир сиригэр ыытылынна. Бырайыак сүрүн дьоруойунан бүтүн эпоха киһитэ, лүөччүк-космонавт, икки төгүллээх Сэбиэскэй Сойуус Дьоруойа Виктор Савиных буолла. Кини Албан аат саалатыгар, дьоруойдар ааттара суруллубут мрамор пилоннар ортолоругар, эргэ фотоальбом лиистэрин арыйан, көрөөччүлэргэ хорсун быһыы уонна дьылҕа тыыннаах  устуоруйатын кэпсээтэ.

«Биһиэхэ бу бырайыак – клиптээҕэр ордук суолталаах. Каадырга тиллэр өйдөбүл мрамор плиталарга суруллубут ааттар үйэлээх албан ааттарын кытта көрсүһэр эмоциональнай пааматынньыга. Биһиги көннөрү видео устубакка, ааспыт кэмнээҕи хорсун быһыыны бүгүҥҥү дьоруойдары кытта ситимниир муостаны оҥорорго дьулустубут», – диэн «Улицы в лицах» норуоттар икки ардыларынааҕы патриотическай аахсыйа салайааччыта Харитон Руденко бэлиэтээтэ.

Бырайыакка патриотизм уонна өйдөбүл тиэмэтэ чугас артыыстара кытыннылар. Кинилэр истэригэр – пианист, Арассыыйа норуодунай артыыһа Юрий Розум, толорор ускуустуба эйгэтигэр Бүтүн Арассыыйатааҕы уонна норуоттар икки ардыларынааҕы куонкурустар лауреаттара Харитон Руденко, Арассыыйа үтүөлээх артыыһа Анатолий Кисляков салайааччылаах В.С. Попов аатынан Оҕо улахан хора, байыаннай дирижер, подполковник Владимир Волков салайааччылаах Арассыыйа ЫБМ-ын «Лидер» киинин оркестра. Устуу Кыайыы түмэлин иһинэн, норуот хорсун быһыытын туһунан өйдөбүл үйэлэргэ хаалааччы бэлиэ сиргэ ыытыллыбыта бырайыакка ураты суолтаны биэрэр.

Бырайыак РФ Култууратын министиэристибэтин, Гражданскай оборуона, ыксаллаах быһыы-майгы дьыалаларыгар уонна айылҕа быһылааннарын содулларын туоратыыга министиэристибэтин уонна Александра Пахмутова Култуурунай пуондатын өйөбүлүнэн олоххо киирдэ. Өйдөбүнньүк видеоклип сүрэхтэниитэ Аҕа дойду Дьоруойдарын күнүн иннинэ, ахсынньы 8 күнүгэр буолуоҕа уонна сыыппара былаһааккаларыгар тахсыаҕа. Источник: sakha.gov.ru