«Аҕа дойду көмүскээччилэрэ» пуонда 200-тэн тахса тэрээһини ыытта

Сыл саҕаланыаҕыттан Саха сиригэр «Аҕа дойду көмүскээччилэрэ» анал байыаннай дьайыы кыттыылаахтарын өйүүр Судаарыстыбаннай пуонда филиалын өйөбүлүнэн, байыаннай дьайыылар бэтэрээннэрин уонна өлбүт байыаннай сулууспалаахтар дьиэ кэргэттэрин кыттыыларынан 220 тэрээһин ыытылынна.

«Биһиги оҕолору уонна ыччаттары патриотическайдык иитэр 100-тэн тахса тэрээһини, 80 спортивнай уонна култуурунай-сынньалаҥ тэрээһиннэрин уонна Аҕа дойду көмүскээччилэрин хорсун быһыыларын үйэтитиигэ туһуламмыт 30-тан тахса тэрээһини ыыттыбыт. Ити тэрээһиннэргэ 15 тыһыынчаттан тахса киһи хабылынна», – диэн филиал уопсастыбаннай бырайыактарга салайааччытын солбуйааччыта Симона Томская бэлиэтээтэ.

Кини иһитиннэрбитинэн, бэс ыйын 16-19 күннэригэр «Своих не бросаем!» социальнай-патриотическай бырайыак чэрчитинэн, «Малахит» анал тимир суол рейстэрин бырагырааматынан анал байыаннай дьайыыга өлбүт байыастар 5 кыттыылаах ийэтэ Москва, Казань, Екатеринбург уонна Нижнэй Новгород куораттарга сырыттылар. Тур бырагырааматыгар куораттарынан уопсай экскурсиялар, түмэллэргэ, куораттар кэрэ-бэлиэ сирдэригэр сылдьыы уонна араас маастар-кылаастар ыытылыннылар.