«Аҕа дойду көмүскээччилэрэ» пуонда бэтэрээннэргэ үөрэх уонна идэ ылалларыгар көмөлөһөр

«Аҕа дойду көмүскээччилэрэ» пуонда байыаннай дьайыы кыттыылаахтарыгар уонна бэтэрээннэригэр үөрэх ылалларыгар, саҥа идэни баһылыылларыгар көмөлөһөр. Бу үлэ кинилэр эйэлээх олоххо төннөллөрүгэр уонна инники идэлэрин булуналларыгар туһуланар. Саҥаттан үөрэнии уонна идэни уларытыы, кэнники үлэҕэ киириини кытта, биир саамай наадалаах хайысха буолла.

Арассыыйа Дьоруойдара Андрей Григорьев уонна Алексей Петров Арктикатааҕы судаарыстыбаннай агротехнологическай университекка тыа сиригэр наадалаах идэлэргэ үөрэнэллэр. Кинилэр атын устудьуоннары кытта тэҥҥэ үөрэнэллэр уонна кэнники бэйэлэрин оройуоннарыгар бааһынай хаһаайыстыба тэринэн, аграрнай бородууксуйаны сайыннарар былааннаахтар.

Бырагыраама кыттыылаахтара этэллэринэн, үөрэххэ кинилэр бэйэлэрин баҕаларынан киирбиттэр. Саҥа идэни баһылааһын эйэлээх олоххо бэйэни булунарга эрэ буолбакка, өрөспүүбүлүкэҕэ уонна дойдуга туһа аҕаларга кыаҕы биэрэр.

«Кырдьыгынан эттэххэ, аныгы кэмҥэ туох барыта уларыйбыт. Урут биһиги үөрэнэрбит курдук буолбатах. Билигин атын кэм, атын балаһыанньа», — диэн Арассыыйа Дьоруойа Андрей Григорьев эттэ.

Дьоруойдар талбыт үөрэхтэрин хайысхалара тыа сирин кытта сибээстээхтэр уонна кэнники үлэҕэ киирэллэригэр кыаҕы биэриэхтэрэ.

«Уруккуттан тыа хаһаайыстыбатынан дьарыктаныахпын баҕарарым. Билигин соччо кыаллыбат, ол гынан баран кэлэр сылга убаһам элбээн, үчүгэйдик ылсан дьарыктаныам», — диэн Арассыыйа Дьоруойа Алексей Петров санаатын үллэһиннэ.

Сиһилии: https://www.sakha.gov.ru/news/19249