Аҕа дойду сэриитин бэтэрээннэрин күннүктэрэ баар буолуоҕа

Улуу Кыайыы 80 сылынан «Память поколений» эстэпиэтэ саҕаланна. Өрөспүүбүлүкэҕэ сонун хайысха сыл устата ыытыллар. 

Эрэгийиэннээҕи бырайыагы «Бастакылар хамсааһыннара» оҕолор, ыччаттар уопсастыбаннай-судаарыстыбаннай хамсааһыннарын настаабынньыга, СӨ култууратын уонна духуобунай сайдыытын миниистирэ Афанасий Ноев көҕүлээбит.

Өрөспүүбүлүкэҕэ сыл устата Аҕа дойду уоттаах сэриитин дьоруойдарыгар, тыыл бэтэрээннэригэр, сэрии сылларын оҕолоругар, байыаннай дьайыы кыттыылаахтарыгар, бойобуой дьайыылар бэтэрээннэригэр, биһиги кэммит дьоруой-оҕолоругар анаммыт 80 күннүк — подкастар оҥоһуллан тахсыахтара. Бырайыак дьоруойдар ааттарын кэнчээри ыччат өйдүү-саныы сылдьарыгар ананар.

Бырайыакка кыттарга туох ирдэнэрий:

— Бастакылар хамсааһыннарын көхтөөх дьонун кыттыһыннаран туран подкаст устуута;

— Хамсааһын кыттыылаахтарын, настаабынньыктары, тыыл бэтэрээннэрин, сэрии сылларын оҕолорун, СВО кыттыылаахтарын, бойобуой дьайыылар бэтэрээннэрин, билиҥҥи кэм дьоруой-оҕолорун ыҥыран көрсүһүүнү тэрийии;

— түмэллэргэ, мемориальнай комплекстарга экскурсиялары тэрийии;

— үөрүүлээх тэрээһини тэрийэн ыытыы, Аҕа дойду уоттаах сэриитин, СВО дьоруойдарыгар анаммыт пааматынньыктары уонна мемориаллары тупсаран оҥоруу;

— көрсүһүү иитинэн быыстапканы тэрийии (сыл устатыгар экспозицияны уларыта сылдьан).

Хамсааһын активистара кыттыылаах дьоруойдар олохторун туһунан интервьюлары оҥоруохха сөп. Онуоха сюжеттар архыып докумуоннарыгар, историяны кэрэһилиир хаартыскаларга, ахтыыларга олоҕуруохтаахтар.

Бырайыагы тэрийээччилэр: Саха сиригэр «Бастакылар хамсааһыннара», СӨ култууратын уонна духуобунай сайдыытын министиэристибэтэ, СӨ тас сибээскэ уонна норуоттар дьыалаларыгар министиэристибэ, СӨ Национальнай архыыба.

Санатар буоллахха, Арассыыйаҕа 2025 сыл Аҕа дойдуну, Саха сиригэр Ийэ дойдуну көмүскээччилэр сылларынан биллэриллибитэ.

#ПамятьПоколений
#ХранителиИстории
#ДвижениеПервыхЯкутия

СӨ Ил Дарханын уонна Бырабыыталыстыбатын пресс-сулууспата