Ытык кырдьаҕаска «СӨ Бочуоттаах олохтооҕо» бэлиэ туттарылынна

СӨ Бырабыыталыстыбатын бэрэссэдээтэлин бастакы солбуйааччы Дьулустаан Борисов Аҕа дойду сэриитин кыттыылааҕар, 102 саастаах Семён Иванович Колтовскойга «СӨ Бочуоттаах олохтооҕо» бэлиэни уонна «1941-1945 сс. Аҕа дойду сэриитигэр Кыайыы 80 сылынан» үбүлүөйдээх мэтээли туттарда.

Ил Дархан ыйааҕынан 1941-1945 сылларга Аҕа дойду Улуу сэриитин кэмигэр эр санаатын уонна хорсун-хоодуот быһыытын, үүнэр көлүөнэни патриотическай иитиигэ укпут кылаатын уонна өр сылларга үтүө суобастаах үлэтин иһин, Аҕа дойдуну көмүскээччи күнүн көрсө сэрии бэтэрээнигэр бочуоттаах аат иҥэриллибитэ.

Дьулустаан Борисов Ил Дархан аатыттан Семён Иванович Колтовскойу наҕараадатынан эҕэрдэлээтэ уонна этэҥҥэ буолууну, доруобуйаны баҕарда.

Семён Иванович Колтовской — Аҕа дойду сэриитин бэтэрээнэ, 1945 сыллааҕы сэбиэскэй-дьоппуон сэриитин кыттыылааҕа. Аҕа дойду сэриитин 2-с истиэпэннээх уордьанынан, «Бойобуой үтүөлэрин иһин», «Германияны кыайыы иһин», «Японияны кыайыы иһин», «Эҥкилэ суох сулууспатын иһин» мэтээллэринэн уонна да атын биэдэмистибэннэй, уопсастыбаннай наҕараадаларынан наҕараадаламмыта. Милииссийэ туйгуна.

Семён Иванович 1922 сыллаахха балаҕан ыйын 9 күнүгэр Бүлүү улууһугар Кыргыдайга төрөөбүтэ. Аҕа дойду сэриитин бастакы сылларыгар холкуоһугар биригэдьиирдээбитэ. 1944 сыллаахха аармыйаҕа ыҥырыллан, 25-с Кыһыл Знамялаах аттаах-механизированнай биригээдэҕэ сулууспалаабыта. Забайкальскай фроҥҥа генерал Плиев бөлөҕүн састаабыгар киирэн, Хинган-Мукден кимэн киирэр эпэрээссийэтигэр кыттыбыта. Сэрии кэнниттэн комсомольскай тэрилтэ Семён Ивановиһы МГБ үлэҕэ ыыппыта. Сулууспатын Дьокуускай куорат милииссийэтин бастакы салаатыгар постовойунан саҕалаабыта. Үс сылынан ураты суолталаах эбийиэктэри харыстыыр ​​эппиэттээх үлэҕэ анаммыта. ССКП Саха сиринээҕи обкомун дьиэтин харабыллыыр биэдэмистибэннэй милииссийэ салаатын хамандыырынан буолбута. Бу туһунан Ил Дархан, бырабыыталыстыба пресс-сулууспата иһитиннэрэр.