Аҕа дойду Улуу сэриитин бэтэрээнэ Кирилл Попов туһунан киинэни көрдөрүөхтэрэ

Алтынньы 17 күнүгэр Аҕа дойду Улуу сэриитин бэтэрээнэ, Социалистическай Үлэ Дьоруойа, Ленин уордьанын, «Сиэрпэ уонна Өтүйэ» кыһыл көмүс мэтээлин, Кыһыл Сулус уордьанын уонна «Кенигсбергы ылыы иһин» мэтээл кавалера, дьиҥнээх лидер уонна талааннаах салайааччы Кирилл Егорович Попов туһунан документальнай киинэ көрдөрүүтэ буолуоҕа.

Бу киинэ – сэриини дьоруойдуу ааспыт, бэйэтин хорсун уонна күүстээх буойун быһыытынан көрдөрбүт, элбэх хорсун быһыыны оҥорбут киһи туһунан кэпсээн.

Кирилл Егорович – Саха сирин дьылҕатын уларыппыт дьонтон биирдэстэрэ, сэрии кэнниттэн мас  бырамыысыланнаһын сайыннарбыта, саҥаны киллэрбитэ, Өлүөхүмэтээҕи леспромхоһу түөрт сыл иһигэр бастыҥ тэрилтэлэр кэккэлэригэр таһаарбыта.

Киинэҕэ ураты архыып матырыйаалларын, дьоруойу кытта сибээстээх өйдөбүнньүк сирдэри көрүөххэ, кини дьиэ кэргэнин туһунан уонна Кирилл Попов хайдахтаах курдук улуу киһи буоларын билиэххэ сөп. Документальнай киинэни «Мин Сахам сирэ» устуудьуйа айар бөлөҕө уһулбут. Бу киинэ легендарнай көлүөнэлэр, сэрии бэтэрээннэрин ааттарын үйэтитэр киинэлэр цикллэригэр киирэр. Көрдөрүү алтынньы 17 күнүгэр 16 чааска «Арассыыйа – мин устуоруйам» историческай пааркаҕа буолуоҕа.