Аҕа дойду Улуу сэриитин бэтэрээнин ырыанан эҕэрдэлээтилэр

Сыл аайы Кыайыы күнүн көрсө, бэтэрээннэргэ, сэрии сылларын оҕолоругар анаан араас тэрээһиннэр ыытыллаллар. Быйыл эмиэ үгэс буолбут «Тиэргэнинэн ыллыыбыт» аахсыйанан, ытык дьоммут олорор сирдэринэн, тиэргэннэригэр тиийэн эдэр көлүөнэ ыллаан-туойан эҕэрдэтин тиэрдэр.

Бүгүн «Тиэргэнинэн ыллыыбыт»  аахсыйа чэрчитинэн Дьокуускай куоракка олорор Аҕа дойду Улуу сэриитин I истиэпэннээх уонна Үлэ Кыһыл Знамята уордьаннар кавалердарын, Саха АССР норуотун хаһаайыстыбатын үтүөлээх үлэһитин, Саха сирин уонна Бүлүү улууһун бочуоттаах олохтооҕун, өрөспүүбүлүкэ судаарыстыбаннай бириэмийэтин лауреатын Кирилл Павловы Улуу Кыайыы күнүнэн эҕэрдэлээтилэр. Бу туһунан СИА иһитиннэрэр.

«Бүгүн биһиги үгэскэ кубулуйбут «Тиэргэнинэн ыллыыбыт» аахсыйаны ыытабыт. Бу аахсыйа уопсастыбаннас бэрэстэбиитэллэрин, былааһы, ыччаты уонна кырдьаҕас көлүөнэни холбуур. Бэтэрээннэри Кыайыы күнүнэн эҕэрдэлээһин – үтүө быһыы бастыҥ холобурунан буолар. Биһиги Ийэ дойдубутун көмүскээбит, дьоллоохтук олорорбутугар олугу уурбут аҕаларбыт, эһэлэрбит хорсун быһыыларын ытыктыахтаахпыт, чиэстиэхтээхпит, кинилэр ааттарын үйэтитиэхтээхпит», — диэтэ СӨ Бырабыыталыстыбатын бэрэссэдээтэлин солбуйааччы Георгий Степанов.

Кирилл Егорович Павлов 1926 с. атырдьах ыйын 5 күнүгэр Бүлүү улууһун Чочу нэһилиэгэр төрөөбүтэ. Кини педагогическай училищеҕа үөрэнэ сылдьан, 1944 с. бэс ыйын 3 күнүгэр Кыһыл Аармыйа кэккэтигэр ыҥырыллыбыта. Кирилл Егорович Квантунскай аармыйаны үлтүрүтэргэ кыттыбыта, Монголияны дьоппуон талабырдьыттарыттан босхолоспута.