Аҕа дойду Улуу сэриитин бэтэрээннэригэр биирдэ бэриллэр төлөбүр оҥоһулунна

Айсен Николаев сорудаҕынан муус устар 1 күнүгэр диэри Аҕа дойду Улуу сэриитин 13958 бэтэрээнигэр уопсайа 172 мөл. солк.  тахса  суумалаах биирдэ бэриллэр төлөбүр оҥоһулунна.

Бу туһунан бүгүн СӨ Бырабыыталыстыбатын бэрэссэдээтэлин солбуйааччы Ольга Балабкина ыыппыт Олохтоох бэйэни салайыныы сэбиэтин мунньаҕар СӨ Үлэҕэ уонна социальнай сайдыыга миниистирэ Елена Волкова иһитиннэрдэ.

“Өрөспүүбүлүкэ РФ Бэрэсидьиэнин Ыйааҕынан сэрии кыттыылаахтарыгар, блокадаламмыт Ленинград олохтоохторугар, концлааҕырдарга сокуоннай саастарын туола иликтэринэ хаайыллыбыттарга уонна тыл бэтэрээннэригэр үбүлүөйдээх мэтээллэри туттарыыны түмүктээтэ. Наҕарааданы 1688 сэрии бэтэрээнэ ылла”, — диэтэ биэдэмистибэ салайааччыта.

Ил Дархан иһинэн Олохтоох бэйэни салайыныы сэбиэтэ «Олохтоох бэйэни салайыныыны уонна судаарыстыбаннай былаас биир кэлим систиэмэтин тэрийии уопсай бириинсиптэрин туһунан» Федеральнай сокуону олоххо киллэриигэ дьаһал былаанын уонна коррупцияны утары охсуһар боппуруостары көрдө.

«Ылыллыбыт сокуон олохтоох бэйэни салайыныы икки таһымнаах систиэмэтин оннунан хаалларары мэктиэлиир, ону тэҥэ билиҥҥи кыраныыссаларын туппутунан муниципальнай оройуонтан муниципальнай уокурукка көһөр кыах бэриллэр», — диэн бэлиэтээтэ СӨ Ил Дарханын, бырабыыталыстыбатын дьаһалтатын салайааччыта Георгий Михайлов.

Ил Дархан, бырабыыталыстыба пресс-сулууспата.