Аҕа дойду Улуу сэриитин кыттыылааҕын кэлэн иһэр Кыайыы күнүнэн эҕэрдэлээтилэр

Улуу Кыайыы күнүн иннинэ Саха сирин Бырабыыталыстыбатын бэрэссэдээтэлин солбуйааччы Георгий Степанов сэрии кыттыылааҕын, тыыл бэтэрээнин, өрөспүүбүлүкэ Бочуоттаах олохтооҕун, 101 саастаах Валентина Васильевна Ефремованы эҕэрдэлээтэ. Дьокуускайга кини дьиэтин тиэргэнигэр “Тиэргэнинэн ыллыыбыт” Бүтүн Арассыыйатааҕы аахсыйа иитинэн Аҕа дойду Улуу сэриитин дьоруойдарыгар аналлаах биллэр байыаннай ырыалар дуорайдылар.

Валентина Васильевна Саха сирин олохтоохторугар эр санааланыы, героизм уонна Ийэ дойдуга бэриниилээх буолуу холобурун көрдөрөр диэн Георгий Степанов бэлиэтээтэ. “Эн – сэрии бары ыар баттыгын ааспыт дьиҥнээх сэбиэскэй, дьоруойдуу санаалаах ытык киһигин. Эйигин туох даҕаны кэҕиннэрбэтэҕэ, сэриилэспитиҥ, үлэлээбитиҥ, үүнэр саҥа көлүөнэни улаатыннардыҥ. Ис сүрэхпититтэн махтанабыт. Ил Дархан Айсен Сергеевич Николаев уона Бырабыыталыста аатыттан Улуу Кыайыы 80 сылынан эҕэрдэлиибин. Уһун үйэни, чугас дьоҥҥор, аймахтарга үтүө туругу, дьолу баҕарабын”, – диэн Георгий Степанов эттэ.

Дьоро тэрээһиҥҥэ эҕэрдэ тылларын байыаннай дьайыы кыттыылааҕа, Арассыыйа Дьоруойа, ыччат уонна социальнай коммуникациялар дьыалаларын миниистирин эбээһинэһин толорооччу Игорь Юргин, физическэй култуура уонна успуорт миниистирин бастакы солбуйааччы Гаврил Мохначевскай, Дьокуускай куорат баһылыгын солбуйааччы Владимир Аржаков эттилэр.

Сэрии кыттыылааҕар, мэдиссиинэ сулууспатын младшай сержаныгар Валентина Ефремоваҕа Улуу Кыайыы 80 сылынан 14129 байыаннай чаас хонтуруоллуур-кэмниир пуун начаалынньыга, подполковник Владимир Леоненко үөрүүлээх быһыыга Кыһыл Аармыйа мэдиссиинэҕэ сулууспатын Знамятын туттарда.

Бэтэрээн дьиэтин иннигэр оскуола үөрэнээччилэрэ кыттыылаах “Өлбөт үйэлээх полк” хаамыыны тэрийдилэр.

Дьокуускай куорат 33-с нүөмэрдээх оскуолатын 9 “Г” кылааһын үөрэнээччилэрэ өссө 2-с кылааска үөрэнэ сылдьан бэтэрээни кытта шефтэспиттэрэ, Валентина Васильевнаҕа тыыннаах сибэкки туттардылар.

Валентина Васильевна 1924 сыллаахха Калининскай уобалас Вышний Волочегар төрөөбүтэ. 1940 сыллаахха штурман буолар баҕалаах Ленинградтааҕы өрүс тиэхиньикумугар киирбитэ эрээри, сэрии былаанын барытын туора соппута. Сэрии бастакы күннэриттэн атын комсомуоллаахтары кытта тааҥканы тохтотор хорууну хаспыта, Кыһыл Кириэс кууруһун ааспыта. Сокуоннай сааһын ситэ илик да буоллар, фроҥҥа барары ситиспитэ. Мэдиссиинэ сулууспатын младшай сержана Москваттан Кенигсберга диэри байыаннай айаны ааспыта. Кыайыы кэнниттэн баҕа өттүнэн Уһук Илин уокурукка туруммута.

Сэрии кэнниттэн Валентина Васильевна номнуо 70-тан тахса сыл устата ыччаты патриотическай тыыҥҥа иитиинэн дьарыктанар фронтовой дьүөгэлиилэр “Катюша” аатырбыт кулууптарын төрүттэспитэ. Бу туһунан Ил Дархан уонна Бырабыыталыстыба пресс-сулууспата суруйар.