Аҕа дойду Улуу сэриитин кыттыылаахтарыгар “СӨ Бочуоттаах олохтооҕо” үрдүк аат иҥэрилиннэ

Аҕа дойдуну көмүскээччи күнүн иннигэр биһиги эйэлээх, нус-хас олохпутун араҥаччылыыр, ол көмүскэлигэр турар буойуннарбытын эҕэрдэлиир ытык иэспит.

Биһиги өрөспүүбүлүкэбитигэр 9 Аҕа дойду Улуу сэриитин кыттыылааҕа, 16 Ленинград блокадатыгар, концлааҕырдарга түбэспит дьон, 208 сэрии бэтэрээнин огдообото, 1500 кэриҥэ тыыл бэтэрээнэ уонна 13 тыһыынчаттан тахса сэрии сылларын оҕолоро олороллор.

Бүгүн Өрөспүүбүлүкэ саалатыгар Ил Дархан Айсен Николаев Аҕа дойду Улуу сэриитин кыттыылаахтарын, тыыл бэтэрээннэрин, байыаннай дьайыы буойуннарын Аҕа дойдуну көмүскээччи күнүнэн эҕэрдэлээн туран, Аҕа дойду Улуу сэриитин кыттыылаахтарыгар Николай Иванович Афанасьевка, Алексей Николаевич Березкиҥҥа, Мартын Герасимович Григорьевка, Ефремова Валентина Васильевнаҕа, Семен Иванович Колтовскойга, Наум Трифонович Слепцовка, Валерий Михайлович Спиридоновка “Саха Өрөспүүбүлүкэтин Бочуоттаах олохтооҕо” үрдүк наҕарааданы туттарда.

Харда тылы Аҕа дойду сэриитин II истиэпэннээх уордьанын кавалера, “Японияны кыайыы иһин” мэтээллээх, СӨ Бочуоттаах олохтооҕо Валерий Спиридонов эттэ:

“Маннык үрдүк наҕараада мээнэ бэриллибэт. Биһиги өрөспүүбүлүкэбит үүнэ-сайда турарын  туһугар чиэһинэйдик, үтүө суобастаахтык үлэлээбиппит. Барыгытыгар ис сүрэхтэн улахан махтал буоллун”.

Аҕа дойду Улуу сэриитин кыттыылааҕа, СӨ Бочуоттаах олохтооҕо Наум Трифонович Слепцов эмиэ Японияны утары сэрии кыттыылааҕа.

“Дойдубут Бэрэсидьиэнэ Владимир Путин ким да умнуллубатын, туох да умнуллубатын туһугар элбэҕи үлэлиир, элбэҕи ситистэ. Бу үлэ өссө да салҕанан бара туруохтун. Мин 1945 сыллаахха стрелковай дивизия  152-с ударнай полкатын састаабыгар киирсэн, атырдьах ыйын 11-17 күннэригэр Хайлар куораты штурмалаан ылбыппыт. Квантунскай аармыйа олус элбэх саллаатын уонна эписсиэрин билиэн туппуппут”, — диэн албан ааттаах устуоруйатыттан быһа тардан кэпсээтэ.

Санатан эттэххэ, олунньу 20 күнүгэр “Кыайыы бастионнара” диэн аахсыйа саҕаланна. Саха сириттэн сэриигэ барбыт буойуннары кэриэстээн, Смоленскай, Псковскай, Калужскай, Новгородскай уобаластарга буойуттар ааттарын киллэрэн туран өйдөбүнньүктэр туруохтара. Ону тэҥэ Сталинград оборуонатыгар сэриилэспит биир дойдулаахтарбытыгар аналлаах  өйдөбүнньүк бэлиэ Мамай кургааҥҥа туруоруллуоҕа. Дьокуускайга сахалартан бастакынан Сэбиэскэй Союз Дьоруойа буолбут Федор Поповка өйдөбүнньүк туруоҕа.