Аҕа дойдуну көмүскээччи – эн үрдүк ааккар сүгүрүйэбит!

Аҕыс уон сыл анараа өттүгэр, аан дойдуну аймаабыт, харах уута тохтуулаах Аҕа дойду Улуу сэриитэ бүтэн, Кыайыы салюта ньиргийбитэ. Аҕа дойду Улуу сэриитэ биhиги норуоппутугар аата-ахсаана биллибэт эрэйи-муҥу, кутурҕаны аҕалбыта.

Биһиги киэҥ-куоҥ Ийэ дойдубут хас биирдии муннугар, ол иһигэр Саха сиригэр, «Барыта – фронт туһугар!» дьон-сэргэ олоҕун, доруобуйатын харыстаабакка үлэ үөһүгэр түспүтэ.
Онтон бүгүн, Аҕа дойду Дьоруойдарын күнүгэр, биһиги ол кэмнэри ахтан-санаан ааһарбыт, урукку кэм уонна билиҥҥи кэм дьоруойдарын ахтан-санаан ааһарбыт – ытык иэспит. Хорсун быһыы, эр санаа уонна Аҕа дойдуга бэриниилээх буолуу утума көлүөнэттэн көлүөнэҕэ бэриллэн, биһиги хамсаабат тирэхпитинэн, уҕараабат күүспүтүнэн буолар.
Бүгүн Дьокуускайга Аҕа дойдубут бары көлүөнэ дьоруойдарын ахтан-санаан ааһар уонна Улуу Кыайыы 80 сылын түмүктүүр тэрээһиннэр буоллулар. Ю.А. Гагарин аатынан култуура уонна аныгы искусство киинигэр «Дьоруойу кытары кэпсэтии» тэрээһиҥҥэ Аҕа дойду Улуу сэриитин уонна анал байыаннай дьайыы туһунан чахчылары оҥоһуу өй көмөтүнэн токурутуу тиэмэҕэ дьүүллэһии ыытылынна.
Бу кииҥҥэ  «Герои земляки», «Жены СВОих Героев», «Защитники Отечества», анал байыаннай дьайыы кыттыылааҕа Вячеслав Козловскай «Искусство жизни и борьбы» фотобыыстапкалара турдулар.
Киэһэтин Аҕа дойду дьоруойдарын чиэстиир уонна Улуу Кыайыы 80 сылын түмүктүүр тэрээһиннэр буоллулар. Тэрээһиҥҥэ күндү ыалдьыт быһыытынан Аҕа дойду Улуу сэриитин бэтэрээнэ, СӨ Бочуоттаах олохтооҕо Наум Трифонович Слепцов уонна анал байыаннай дьайыы кыттыылааҕа, Арассыыйа Дьоруойа Алексей Рафаэлович Петров уонна анал байыаннай дьайыы кыттыылаахтара буоллулар.
Бэлиэ тэрээһини Саха сиринээҕи ИДьМ ансаабыла «Пусть будет Победа!» ырыатынан аста. Ол кэннэ Арассыыйа уонна Саха сирин өрөгөй ырыалара дьиэрэйдэ.
Салгыы СӨ Баһылыгын уонна Бырабыыталыстыбатын дьаһалтатын салайааччыта Георгий Михайлов биһиги дьоруойдарбытыгар сүгүрүйэбит диэн эттэ:
«Биһиги бүгүн Аҕа дойду сэриитигэр кыттыбыт аҕаларбытын-эһээлэрбитин ахтан-санаан ааһабыт. Биһиги кинилэринэн уонна билигин анал байыаннай дьайыыга сылдьар биир дойдулаахтарбытынан киэн туттабыт. Быйыл биһиги Улуу Кыайыы 80 сылын бэлиэтээтибит, бүгүн Аҕа дойду сэриитин бэтэрээннэрин уонна анал байыаннай дьайыы дьоруойдарын чиэстиибит. Бүгүн биһиги тыылга сылдьан көмөлөһөр дьоммутугар махтанабыт. Махтанабыт волонтердарга уонна устуоруйа чахчытын тарҕата сылдьар дьоҥҥо».
Билиҥҥи кэмҥэ биһиги биир дойдулаахтарбыт, буойуттарбыт анал байыаннай дьайыыга хорсуннук-хоодуоттук сэриилэһэ сылдьаллар. Ураты хорсун быһыыны көрдөрбүт байыастарга наҕараадалары туттардылар. Ол иһигэр
«Хорсун быһыы» уордьаны,
Сибэтиэй Георгий уордьанын IV истиэпэннээх Георгиевскай кириэс бэлиэтин,
«Хорсунун иһин» II истиэпэннээх мэтээли,
«Өлөн эрэр дьону быыһаабытын иһин» мэтээли,
Лука Крымскай мэтээли,
Арассыыйа Федерациятын Оборонаҕа министиэристибэтин «Саллаат албан аатын иһин» II истиэпэннээх мэтээлин туттардылар.
Маны сэргэ мэлдьи көмөлөһөр волонтердарга Махтал суруктары, байыастар кэргэттэригэр «Анал байыаннай дьайыы кыттыылааҕын кэргэнигэр» мэтээли туттардылар.
Ийэ дойдуга таптал кини историятын ытыктыыртан, кини интэриэһигэр  бэриниилээх буолууттан, Дьоруойдарыгар сүгүрүйүүттэн саҕаланар.