“Аҕа дойдуну көмүскээччилэр” пуонда сыл саҥатыттан 1390 туһааннаах ыйытыынан үлэлээтэ

Саха сиринээҕи “Аҕа дойдуну көмүскээччилэр” анал байыаннай дьайыы кыттыылаахтарын өйүүр судаарыстыбаннай пуонда филиала 2024 сылга мэдиссиинискэй уонна уйулҕа-психотерапевтическэй боппуруостарынан киирбит 1390 туһааннаах ыйытыынан  үлэлэстэ, ол иһигэр 255 ыйытыы бойобуой дьайыылар бэтэрээннэриттэн киирбитэ. 136 киһи, ол иһигэр 32 бэтэрээн мэдиссиинискэй реабилитацияны бардылар.

Бу туһунан “Аҕа дойдуну көмүскээччилэр” судаарыстыбаннай пуонда филиалын мэдиссиинискэй арыаллааһыҥҥа салайааччытын солбуйааччы Татьяна Никифорова иһитиннэрдэ.

СӨ Доруобуйаҕа харыстабылын министиэристибэтин кытта түһэрсиллибит сөбүлэһии чэрчитинэн байыаннай дьайыы кыттыылаахтарыгар уонна кинилэр дьиэ кэргэттэригэр, ол иһигэр 100 байыаннай дьайыылар бэтэрээннэригэр 453 мэдиссиинэ көмөтө оҥоһуллубут.

“Санаторнай-куруортунай эмтэниини 46 киһи, ол иһигэр 4 бэтэрээн “Бэс Чагда” (Москва), “Чэбдик”, “Абырал” (Дьокуускай) санаторийдарга ыллылар. Уйулҕа-психотерапевтическэй көмө Пуонда филиалын дьиэтигэр 745 киһиэхэ, ол иһигэр 117 байыаннай дьайыылар бэтэрээннэригэр оҥоһулунна”, — диэн бэлиэтээтэ Татьяна Никифорова.

Кини этэринэн, СӨ Доруобуйаҕа харыстабылын министиэристибэтэ муус устар 4 күнүттэн анал байыаннай дьайыы кыттыылаахтарыгар — байыаннай дьайыылар бэтэрээннэригэр мэдиссиинискэй көрүүнү уонна диспансеризацияны ыытар. 256 киһи бу диспансеризацияны ааспыт.

“Клиническэй психолог сүбэтин 157 киһи, эбии чопчулаан көрөр исписэлиистэри 173 киһи аастылар.  Байыаннай дьайыылар бэтэрээннэригэр ыытыллар диспансеризация бу сыл бүтүөр диэри салҕаныа”, — диэн эбэн эттэ.

Санатан эттэххэ,  Саха сиринээҕи “Аҕа дойдуну көмүскээччилэр” анал байыаннай дьайыы кыттыылаахтарын өйүүр судаарыстыбаннай пуонда филиала маннык аадырыска баар: Дьокуускай, Ойуунускай уул. 41/1 №-дээх дьиэтигэр, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.