«Аҕа дойдуну көмүскээччилэр» пуонда өрөбүлэ суох үлэлиир

«От ыйын 6 күнүттэн «Аҕа дойдуну көмүскээччилэр» пуонда өрөбүлэ суох үлэлиир. Нэдиэлэ бастакы күнүттэн өрөбүлгэ диэри күн ахсын 09:00 чаастан 18:00 чааска диэри», — диэн этэр Георгий Степанов.

СӨ Бырабыыталыстыбатын Бэрэссэдээтэлин солбуйааччы Георгий Степанов  байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥоруу үлэтэ салҕанарын этэр.

Ол курдук, бүгүҥҥү иһитиннэриигэ этиллибитинэн, 110 ыалга дьиэлэрин гаастааһыҥҥа материальнай көмө оҥоһуллубут, байыаннай сулууспалаахтар төрөппүттэрэ — 340 киһи санаторнай-курортнай эмтэниигэ сылдьыбыт. 302 киһи байыас эмтэнэр сиригэр тиийэргэ материальнай көмөнөн туһаммыт. Доруобуйа харыстабылын тэрилтэлэригэр 743 байыас уонна кинилэр дьиэ кэргэттэрин 1151 чилиэнэ доруобуйаларын чэбдигирдиммиттэр.

«Биир сүрүн хайысханан байыаннай сулууспалаахха уонна кини дьиэ кэргэнигэр дьарыктаах буолууларын хааччыйыыга көмөлөһүү. Нэһилиэнньэ дьарыктаах буолуутун киинигэр үлэ боппуруоһунан 454 киһи сылдьыбыт, ол иһигэр 143 байыаннай дьайыы кыттыылааҕа уонна 311 киһи кинилэр дьиэ кэргэттэриттэн. Мантан 117 киһи идэни ылыыга хос үөрэммит, 286 киһи үлэнэн хааччыллыбыт», — диэн этэр Георгий Степанов.

СӨ Ил Дарханын уонна Бырабыыталыстыбатын пресс-сулууспата