«Аҕа дойдуну көмүскээччилэр» пуонда көмөтүнэн 300-тэн тахса тэрээһин ыытылынна

Сыл саҕаланыаҕыттан «Аҕа дойдуну көмүскээччилэр» судаарыстыбаннай пуонда Саха сиринээҕи филиалын көмөтүнэн байыаннай дьайыылар бэтэрээннэрэ уонна  байыаннай дьайыыга охтубут буойуттар дьиэ кэргэттэрэ кыттыылаах 300-тэн тахса тэрээһин ыытылынна.

Бу туһунан алтынньы 14 күнүгэр ыытыллыбыт брифиҥҥэ пуонда Саха сиринээҕи филиалын салайааччытын солбуйааччы Симона Томская иһитиннэрдэ.

«Тэрээһиннэринэн 24 тыһыынчаттан тахса киһи хабылынна. Биһиги көмөбүтүнэн сыл саҕаланыаҕыттан оҕону уонна ыччаты патриотическай тыыҥҥа иитэр 146 тэрээһин, 116 успуорт уонна култуурунай-сынньалаҥ тэрээһиннэрэ, Аҕа дойду көмүскээччилэрин хорсун быһыыларын үйэтитэр 64 тэрээһин ыытылынна», – диэн Симона Томская бэлиэтээтэ.

Кини иһитиннэрбитинэн, «Знание» Арассыыйатааҕы уопсастыбатын кытта байыаннай дьайыы бэтэрээннэрин оҕону уонна ыччаты патриотическай тыыҥҥа иитиигэ тардар үлэ салҕанар. Суут бириистэптэрин федеральнай сулууспатын управлениета ыҥырыытынан, үлэһиттэр байыаннай дьайыы бэтэрээннэрин кытта көрсүстүлэр. Көрсөһүү кэмигэр байыаннай дьайыы бэтэрээннэрэ Евгений Скрябин уонна Алексей Лупеев  байыаннай дьайыыга кыттыыларын туһунан кэпсээтилэр, ону таһынан «Аҕа дойдуну көмүскээччилэр» пуонда таһаарбыт байыаннай дьайыы кыттыылаахтарын кэпсээннэрин хомуурунньуктарын билиһиннэрдилэр. Ону таһынан, алтынньы 10 күнүгэр филиалга  байыаннай дьайыы 27 кыттааччытыгар «Донбасс доброволеһа» түөскэ кэтиллэр бэлиэни үөрүүлээх быһыыга-майгыга туттардылар.

Тэрээһин чэрчитинэн байыаннай дьайыыга охтубут буойун ийэтэ, Арассыыйа эмчиттэрин конфедерациятын Саха сиринээҕи салаатын салайааччыта Вероника  Семенова көҕүлээһининэн, байыаннай дьайыы кыттыылаахтарыгар көмөлөһөр норуот эмчиттэригэр Арассыыйа эмчиттэрин конфедерациятыттан наҕараадалар уонна махтал суруктар туттарылыннылар.