“Аҕа дойдуну көмүскээччилэр” пуонда сураҕа суох сүппүт буойуттар дьиэ кэргэттэрин кытта эмиэ үлэлэһиэҕэ

Арассыыйа бэрэсидьиэнэ Владимир Путин «Аҕа дойдуну көмүскээччилэр» пуонда үлэтин кэҥэтэн, сураҕа суох сүппүт байыаннай дьайыы кыттыылаахтарын дьиэ кэргэттэрин кытта үлэлэһэллэригэр  дьаһал биэрдэ.

Бу туһунан Кремль кулун тутар 10 күнүгэр бэйэтин саайтыгар иһитиннэрдэ.

Судаарыстыба баһылыга кулун тутар 6 күнүгэр “Аҕа дойдуну көмүскээччи” пуонда үлэһиттэрин кытта көрсүһүү кэнниттэн кэккэ сорудахтар испииһэктэрин бигэргэттэ.

Олор истэригэр Бэрэсидьиэн дьаһалтатыгар “Аҕа дойдуну көмүскээччи” пуонданы кытта 2023 сыл муус устар 3 күнүнээҕи 232 №-дээх ыйаахха уларытыылары киллэриини сорудахтаатылар, ол эбэтэр мантан антах пуонда үлэтэ байыаннай дьайыыга сылдьан, сураҕа суох сүппүт дьон дьиэ кэргэттэригэр кытта тарҕанар буолла.

Эппиэтинэстээх дьонунан РФ Бэрэсидьиэнин Дьаһалтатын салайааччытын бастакы солбуйааччыта Сергей Кириенко уонна оборуона миниистирин солбуйааччы, пуонда салайааччыта Анна Цивилева ананнылар. Дьаһал толоруллар болдьоҕо — 2025 сыл кулун тутар 30 күнүгэр диэри.

“Аҕа дойдуну көмүскээччилэр” пуонда Саха сиринээҕи филиалыгар сураҕа суох сүппүт байыастар чугас дьоннорун кытта үлэ уруккуттан да барарын иһитиннэрдилэр, сыаллаах-соруктаах үлэ билигин дьэ саҕаланыа диэтилэр.