«Аҕа дойдуну көмүскээччилэр» судаарыстыбаннай пуонда филиалын өйөбүлүнэн 400-чэкэ тэрээһин ыытылынна

Тэрээһиннэргэ байыаннай дьайыы бэтэрээннэрэ уонна кыргыһыы хонуутугар охтубут дьон дьиэ кэргэттэрин чилиэннэрэ, барыта 28 тыһыынчаттан тахса киһи кытынна.

Бу туһунан пуонда филиалын салайааччытын солбуйааччы Симона Томская кэпсээтэ.

Аҕа дойду Дьоруойдарын күнүгэр филиал көмөтүнэн улуустарга, Дьокуускайга бойобуой дьайыылар бэтэрээннэрэ уонна кинилэр дьиэ кэргэттэрэ кыттыылаах тэрээһиннэр ыытыллыбыттара. Ол курдук III өрөспүүбүлүкэтээҕи физкултуурунай тэрээһиҥҥэ 16 улуустан уонна Дьокуускай куораттан 130 бойобуой дьайыылар  бэтэрээннэрэ, байыаннай дьайыы кыттыылаахтара кыттыбыттар.

Таатта улууһугар филиал социальнай координатора Яна Винокурова көҕүлээн, «Эн сырдык аатыҥ умнуллубат» хаартысканан быыстапка тэриллибит. Манна төннүбэтэх уолаттар дьиэ кэргэттэрин 44 хаартыскалара көрдөрүүгэ туруоруллубут.

Соторутааҕыта пуонда тэрийиитинэн Москваҕа Аҕа Дойдуну Көмүскээччи Сылын түмүктүүр пуорум буолан ааспыт. Манна Саха сириттэн ыччакка патриотическай иитиини ыытыһар, спортсмен-бэтэрээннэр, каадырабай бырагыраама кыттыылаахтара – барыта 10 киһи кыттыыны ылбыттар, диэн иһитиннэрэр Ил Дархан, бырабыыталыстыба пресс-сулууспата.