Киин куоракка байыастарга успуорка күрэхтэһиилэр буолан аастылар

Киин куоракка Аҕа дойду Дьоруойдарын күнүн көрсө, байыаннай дьайыы бэтэрээннэригэр уонна  кыттыылаахтарыгар аналлаах III Өрөспүүбүлүкэтээҕи физкултуурунай тэрээһин буолан ааста.

Турнир Ийэ дойдуну көмүскээбит уонна көмүскүү сылдьар дьону түмэр үтүө үгэскэ кубулуйда. Бу туһунан «Аҕа дойдуну көмүскээччилэр» пуонда эрэгийиэннээҕи пресс-сулууспата иһитиннэрэр.

Үөрүүлээх аһыллыыга Ил Дархан уонна Бырабыыталыстыба дьаһалтатын салайааччыта Георгий Михайлов, СӨ Физическэй култуураҕа уонна успуорка миниистирэ Леонид Спиридонов, күрэхтэһии сүрүн судьуйата Константин Копылов эҕэрдэ тылларын эттилэр.

Тэрээһин ытык ыалдьытынан «Аҕа дойдуну көмүскээччилэр» судаарыстыбаннай пуонда успуортка департаменын начаалынньыга Сергей Нестеров буолла. Кини пуонда аатыттан эҕэрдэтин тиэрдэн, тэрийээччилэргэ тус бэйэтэ махтанна уонна Саха сирин ураты оруолун бэлиэтээтэ.

«Саха Өрөспүүбүлүкэтэ биһиги дьоруойдарыбытыгар анаан маннык күрэхтэһиилэри ыыппыт биир бастакы эрэгийиэнинэн буолар. Манна дьону успуорка тардар дьиҥнээх систиэмэ олохтоммут. Аҕа дойду Дьоруойдарын күнүн көрсө бу тэрээһин үһүс төгүлүн ыытыллара олус үчүгэй. Бүгүҥҥү күнү эһигини кытта бииргэ атаарарбыттан дьоллоохпун. Кэлбиппиттэн үөрэбин. Эһиги тускутугар ыалдьыам! Кыттааччылар ортолоругар номнуо Бүтүн Арассыыйатааҕы таһымҥа – Кузбасска ыытыллыбыт «Аҕа дойдуну көмүскээччилэр» Куубакка кыттыбыт уолаттары көрөрбүттэн ордук үөрэбин. Эһиги бастакылар кэккэлэригэр баар этигит. Эһиэхэ улахан махтал уонна сүгүрүйүү», – диэн Сергей Витальевич  эттэ.

Итини таһынан, тэрээһиҥҥэ кыттааччылары өйөөрү, Арассыыйа Дьоруойдара Филипп Евсеев уонна Алексей Петров кэлэн кытыннылар. Үөрүүлээх быһыыны-майгыны «Дьээ-буо» этно-фольклор бөлөҕө уонна «Байыаннай дьайыы байыаннайдарын кэриэстэбилэ» Саха сирин ыалларын ансаамбыла киэргэттилэр.