Аҕа көлүөнэ хорсун быһыытын байыаннай дьайыы буойуттара салгыыллар

Ил Дархан Айсен Николаев бүгүн Ил Түмэҥҥэ этиитигэр аҕа көлүөнэ бойобуой үгэстэрин байыаннай дьайыыга сылдьар биир дойдулаахтарбыт салгыыллар диэтэ.

Аҕа дойдуну көмүскээччи сылыгар Саха сирэ үс Арассыыйа Дьоруойдаммытын — Андрей Николаевич Григорьев, Алексей Рафилович Петров уонна Пётр Александрович Киприянов Кыһыл сулуһу ылбыттарын бэлиэтээтэ.

«Хомойуох иһин, сорох түгэҥҥэ бүрүкүрэтиичэскэй хааччахтааһыннар баар буолаллар. Бу балаһыанньа төрүт буолуо суохтаах. Толору иһитиннэрии, сокуонунан араҥаччылааһын — бу оҥоһуллуохтаах үлэ саамай кырата. Мин араас таһымнаах салайааччылартан дойду көмүскээччилэригэр уонна кинилэр дьиэ кэргэттэригэр анаммыт бары көрүҥнээх өйөбүлү оҥороллорун ирдиибин. Буойуттар иннилэригэр турар олус ыарахан кэмҥэ өрөспүүбүлүкэ саҥа эрэгийиэннэр олохтоохторугар бырааттыы көмө илиитин уунна, ДНӨ эбийиэктэри чөлүгэр түһэрии урутаан тэтиминэн барар. Донбаһы фашистартан босхолообут Сэбиэскэй саллааттар уҥуохтарын чөлүгэр түһэрии иһин махталларын этэллэр, бу биһиги уопсай өйдөбүлбүт уонна уопсай устуоруйабыт өссө биир бэлиэтэ. Бүгүн мин аны биирдэ бары Саха сирин олохтоохторугар биһиги буойуттарбытын өйөөбүттэрин иһин махтанабын. Ахсынньы 19 күнүгэр Арассыыйа Федерациятын Бэрэсидьиэнэ Владимир Владимирович Путин быһа эпииргэ эппит тыллара хас биирдии киһини таарыйбыт буолуохтаах диэн эрэнэбин. Владимир Владимирович Путин эппитинэн, аан дойду үрдүнэн саха буойуттарын курдук хорсун, бэриниилээх буойуттар ахсааннаахтар. Биһигини кытта Арассыыйа Дьоруойдара уонна да элбэх байыаннай дьайыы кыттыылаахтара бааллар. Бары кинилэр бэйэлэрин бойобуой хорсун быһыыларынан Ийэ дойдуга бэриниилээхтэрин дакаастаабыттара», — диэтэ Айсен Николаев.
Кини бүтүн күүспүтүн уонна дьайыыларбытын биһиги уопсай сыалбытыгар – дойдубут кыайыытыгар аныыбыт диэтэ. «Ытыктабыллаах биир дойдулаахтарбыт, бу күн, дойдубут Арассыыйа бэйэтин кэнэҕэски олоҕун туһугар охсуһар кэмигэр, биһиги кини күүһүрүүтүгэр салгыы күүспүтүн-уохпутун ууруоҕуҥ!», — диэн Ил Дархан ыҥырда.