Аҕа көлүөнэ спартакиадатын хамаанданан кыайыылаахтара ааттаннылар

Бэс ыйын 6-8 күннэригэр киин куоракка IV Аҕа көлүөнэ спартакиадата ыытылынна. Быйылгы күрэхтэһиигэ 22 муниципальнай оройуонтан сүүмэрдэммит хамаандалар кыттыыны ыллылар. Барыта 135 спортсмен, ол иһигэр 67 — эр киһи, 68 — дьахтар. Спартакиада Дьокуускай куорат биэс успуорт эбийиэгэр буолан ааста.

Санатан эттэххэ, бырагыраамаҕа тоҕус успуотрт көрүҥэ киирбитэ: чэпчэки атлетика, харбааһын, остуол тенниһэ, буулдьанан ытыы, саахымат, дартс, эстафета, ГТО нормативтарын толоруу уонна сарсыардааҥы сэрээккэ. Күрэхтэһии сүрүн судьуйатынан Успуорт үтүөлээх үлэһитэ Альберт Трофимов буолла.

Дьаныардаах киирсии түмүгүнэн Уус Алдан улууһун хамаандата бастаата. Иккис миэстэни Мэҥэ Хаҥалас улууһун хамаандата ылла. Үһүс миэстэҕэ Нам улууһун спортсменнара тигистилэр.

Күрэхтэһии түмүгүнэн СӨ сүүмэрдэммит хамаандата быйыл күһүн буолар Бүтүн Арассыыйатааҕы спартакиада финалыгар кыттыыны ылыаҕа. Бу туһунан УФКиМС пресс-сулууспата иһитиннэрдэ.