«Аҕа күрэҕэ-2023» күрэхтэһии түмүктэннэ

«Аҕа күрэҕэ-2023» өрөспүүбүлүкэ таһымнаах күрэхтэһии түмүктэннэ.

Бары кыттааччылар ох курдук оҥостон, кустук курдук куоһанан кэлбиттэрэ көрүөхтэн астык. Хамаандалар эрбии тииһин курдук эгил-тэгил эристилэр. Түмүккэ Мэҥэ Хаҥалас улууһуттавн кэлбит Вячеслав уонна Ярослав Окороковтар «Аҕа күрэҕэ-2023» кыайыылаахтарынан буоллулар. Аҕаларга уонна уолаттарга үгэс буолбут, ХХIII төгүлүн ыытыллыбыт далааһыннаах күрэхтэһии кыайыылаахтара дуорааннаахтык ааттаннылар, дьон-сэргэ быйылгы күрэһи астына көрдө.

СӨ Үлэҕэ уонна социальнай сайдыыга миниистири солбуйааччы Афанасий Постников кыайыылаах Вячеслав уонна Ярослав Окороковтары истиҥник эҕэрдэлээн туран, Ил Дархан Айсен Николаев бириэмийэтин 300 тыһ.солк. дохсун ытыс тыаһыгар доҕуһуоллатан туттарда.

Үтүө үгэскэ кубулуйбут аҕалар уонна уолаттар күрэхтэһиилэрин кыайыылаахтарыгар Ил Дархан Айсен Николаев эҕэрдэтин тиэртэ: «Үгэс курдук Саха сиригэр Уол оҕо күнүн көрсө, «Аҕа күрэҕэ-2023» өрөспүүбүлүкэтээҕи күрэхтэһии сүүрбэ үһүс төгүлүн өрө көтөҕүллүүлээхтик быйыл Таатта улууһугар Туора Күөлгэ  ыытылынна. Сыл ахсын аҕа уонна уол оҕо хамаандата бу умсугутуулаах күрэскэ сүргэлэрэ уратытык көтөҕүллэн түһүлгэҕэ мусталлар. Оттон хас ыал ахсын бу күрэс биллэр-көстөр, сэргэхситэр оруолу ылар. Быйылгы күн күрэскэ 16 улуустан 18 хамаанда күөн көрүстэ. Аҕа уолун кытта ойбон аллардылар, мас эрбээтилэр, мас хайыттылар, уот отуннулар, остуолбаҕа хатааһыннылар, хайыһарга күрэхтэстилэр«.

Тыҥааһыннаах күрэхтэһии түмүгүнэн, иккис бочуоттаах миэстэни Амма улууһуттан кэлэн кыттыбыт Николай уонна Аркадий Федоровтар ыллылар. Кинилэр Ил Дархан 150 тыһ.солк.бириэмийэтинэн наҕараадаланнылар. Үһүс бириистээх миэстэҕэ Чурапчы оройуонуттан кытта кэлбит Кривошапкиннар дьиэ кэргэн аҕа баһылыга Яков уолун Михаилы кытта таҕыстылар. Кинилэргэ Ил Дархан 100 тыһ.солк. бириэмийэтэ туттарылынна.

Күөн күрэхтэһии бары түһүмэхтэригэр сорудахтар аҕалаах уол бииргэ толороллоругар анаан толкуйдаммыт.

Ойбону алларыыга Чурапчы хамаандата — Яков уонна Михаил Кривошапкиннар инники күөҥҥэ таҕыстылар. Иккиһинэн Амматтан кыттыбыт Николай уонна Аркадий Федоровтар алларан үөрүү-көтүү өрөгөйүн биллилэр. Үсүһүнэн Вячеслав уонна Ярослав Окороковтар (Мэҥэ Хаҥалас) буоллулар.

Кутааҕа чэйи оргутуу эмиэ түргэн-тарҕан хамсаныыны, сатабылы эрэйэр. Бу түһүмэххэ бастакынан Бүлүүттэн кэлбит Дмитрий уонна Дьулусхан Ивановтар чэйдэрэ оргуйа охсон дойдулаахтарын үөртүлэр. Иккиһинэн Яков уонна Михаил Кривошапкиннар (Чурапчы) чэйдэрэ оргуйан бидилийдэ. Бу түһүмэххэ Николай уонна Аркадий Федоровтар (Амма) үһүс көрдөрүүлэннилэр.

Мас эрбээһинигэр Хаҥалас ыала Алексей Осипов уолунаан Григорийдыын инники күөҥҥэ түстүлэр. Иккис Таатта хамаандата — Юрий уонна Владимир Осиповтар буоллулар. Үсүһү Николай уонна Аркадий Фёдоровтар (Амма) ыллылар.

Бэрэбинэни суорууга Федоровтар хамаандалара (Амма) кыайыылаах таҕыста. Бу түһүмэххэ иккискэ Иннокентий уонна Кирилл Габышевтар (Уус Алдан) таҕыстылар. Үһүс миэстэҕэ Дьокуускай куораттан кытта тиийбит Александр уонна Арсений Винокуровтар тигистилэр.

Иккис күн хайыһарга күрэхтэстилэр. Бу көрүҥ быйыл саҥа эбии киирбит. Аҕалар кэннилэриттэн уолаттара көхсүлэригэр түөртүү киилэ ыйааһыннааҕы сүгэн баран, 270 м. булчут хайыһарынан сүүрдүлэр.

Бу түһүмэххэ биэтэккэ аан бастакынан Александр уонна Арсений Винокуровтар (Дьокуускай) кэллилэр. Нам хамаандата — Дмитрий, Артур Семеновтар иккис буоллулар. Үсүһүнэн биэтэккэ Вячеслав, Ярослав Окороковтар (Мэҥэ Хаҥалас) таҕыстылар.

Бу кэнниттэн салгыы мас бэлэмнээһинигэр илин-кэлин түсүһүү буолла. Хамаандалар эрбэммит сүүрбэлии чуурканы хайытан саһаанныыллар. Манна Яков, Михаил Кривошапкиннар (Чурапчы) бэриллибит сорудаҕы бастакынан кыайа-хото тутан түмүктээтиилэр. Иккискэ Алексей, Григорий Осиповтар (Хаҥалас) таҕыстылар. Үһүс көрдөрүүлээх Дмитрий уонна Дьулусхан Ивановтар (Бүлүү) буоллулар.

Остуолбаҕа хатаастыыга улахан сыра-сылба баранар. Уонна күрэхтэһии бу көрүҥэ улахан болҕомтону тардар. Манна Дьокуускайтан кыттыбыт Андрей,  Артур Сивцевтэр кыайыы-хотуу көтөллөннүлэр. Мэҥэ Хаҥаластан кыттыбыт Вячеслав, Ярослав Окороковтар кинилэри тилэх үктэстилэр. Манна үһүс миэстэҕэ Александр, Арсений Винокуровтар (Дьокуускай) тигистилэр.

Бары кыттааччылар дипломнары уонна сэртипикээттэри, сыаналаах бириистэри туттулар. Күүрээннээх күрэхтэһииттэн көрөөччүлэр да, кыттааччылар да улаханнык астыннылар. Ордук аҕалар уонна уолаттар хардарыта көмөлөсүһүүттэн үөрүүлэрэ үрдээтэ, сүргэлэрэ көтөҕүлүннэ. Хас биирдии аҕа уолун ситиһиититтэн улаханнык астынна, үөрдэ. Уолаттар аҕаларын күүстэрин-уохтарын, сатабылларын, түргэннэрин-тарҕаннарын, кыахтарын сөхтүлэр, киэн тутуннулар.

Бу сылга муниципальнай таһымҥа күрэхтэһиини тэрийиигэ бастыҥынан Дьокуускай куорат ааттанна. Кинилэр СӨ Үлэҕэ уонна социальнай сайдыыга министиэристибэтин анал бирииһин туттулар. Министиэристибэттэн иһитиннэрбиттэринэн, эһиилгиттэн күрэс географиятын кэҥэтэр, кыттааччыларын элбэтэр туһуттан «Аҕа күрэҕэ» күрэхтэһиини өрөспүүбүлүкэ киин куоратыгар ыыталлар.

СӨ Ил Дарханын уонна Бырабыыталыстыбатын пресс-сулууспата

Хаартыскалар Дмитрий Ляшеев уонна Максим Константинов түһэриилэрэ