«Аҕа күрэҕэ — 2024» иккис күнэ саҕаланна! (видео)

Бүгүн, муус устар 7 күнүгэр, Мэҥэ Хаҥалас улууһугар ыытылла турар «Аҕа күрэҕэ — 2024» иккис күнэ ойбон алларыыттан саҕаланна.

Бу күрэскэ Майаттан сылдьар Поповтар кими да тулуппатылар. Ол оннугар Бүлүүттэн кэлбит Ивановтар атын күрэстэргэ инники кирбиигэ сылдьыбыт фаворит хамаанда буоллахтарына, манна кыратык харгыстаннылар, 19 хамаандаттан 9 эрэ буоллулар.

Ойбон алларыытын кэнниттэн өссө биир сыраны барыыр күрэс — саһаан туруоруута саҕаланна. Аҕалар манна мас хайыталлар, уолаттар аҕалара бүтэһик дүлүҥү хайытарын кытта, хардаҕастары саһааннаан бараллар. Манна мутуктаах дүлүҥ түбэһэн улаханнык моһуоктуон сөп. Сорохтор саһааннаан ортолоон эрдэхтэринэ, атыттар тиһэх дүлүҥнэрин кытта «туста» сылдьаллара көһүннэ.

Билигин түмүктэр тахса иликтэр эрээри, саһаан туруоруутугар аммалар, сунтаардар бастакылар ортолоругар киирсибиттэрэ сэрэйиллэр. Тута билгэлиир кыах суох, хамаандалар икки бөлөххө арахсан күрэхтэһэллэр. Онтон бириэмэни түмэн тиһэх түмүгү таһаараллар.

Бүтэһик эрэ күрэс хаалла — остуолбаҕа хатаастан тахсыы. Ол кэнниттэн уопсай түмүк тахсан сүрүн бирииһи — 300 тыһыынча солкуобайы ким илдьэ барара биллиэҕэ.

«Аҕа күрэҕэ — 2024» күн күрэскэ бириистэрэ мааны.

Хаартыскалар, видео Егор Карпов.