«Аҕа күрэҕэр» бэртээхэй усулуобуйаны тэрийдилэр

25-с сылын ыытыллыбыт үбүлүөйдээх «Аҕа күрэҕэ» быйыл олус тэрээһиннээхтик буолан ааста. 

Тэрээһини быйыл Үлэ уонна социальнай сайдыы министиэристибэтэ успуорт министиэристибэтин, өрөспүүбүлүкэтээҕи «Аҕалар лигалара» уопсастыбаннай тэрилтэ, Дьокуускай куорат дьаһалтатын, киин куорат аҕаларын сэбиэтин кытта бииргэ холбоһон ыытта. Саамай кылаабынайа, кыттааччыларга улахан болҕомто ууруллубут. Үлэ уонна социальнай сайдыы министиэристибэтин иһинэн үлэлиир «Победа» ресурснай киин үлэһиттэрэ икки күнү быһа кыттааччылары биир балааккаҕа түмэн, сылаас аһынан күндүлээтилэр. Онон күрэхтэһэн бүтээт эбэтэр күрэскэ киирсиэх иннинэ ким иллэҥнээҕинэн, кыттааччылар сылаас аһынан үссэнэ сырыттылар.

Тэрээһин туһунан көрсүбүт дьоммуттан ыйыталастым.

Алексей Руфов, Үөһээ Бүлүү улууһун аҕаларын сэбиэтин салайааччыта:

—  Олус күүстээх тэрээһин үлэ барбыта харахха быраҕыллар. Араас улуустартан кэлбит  сүүрбэччэ хамаанда күрэхтэһиэхтээх маһын наардаан, ойбон алларар сирин булан, кыттааччылар ыттар остуолбаларын бэлэмнээн, турар  миэстэтин чиҥник оҥорон, улахан үлэ  барбыта көстөр. Бу маннык улахан тэрээһини бары эппиэттээх министэристибэлэр, муниципальнай былаас, уопсастыбаннай тэрилтэлэр биир сүбэнэн оҥордохторуна эрэ кыаллар суол буоллаҕа. Саамай кылаабынайа, кыттааччыларга улахан болҕомто ууруллубут. Үлэ уонна социальнай сайдыы министиэристибэтин үлэһиттэрэ икки күнү быһа кыттааччылары, суудьуйалары сылаас аһынан күндүлээтилэр. Онон маннык улахан тэрээһиннэргэ ыытарга биһиги да көрө-истэ сылдьан, элбэххэ үөрэннибит. 

Бүлүү улууһуттан кыттыбыт уоллаах аҕа Ян уонна Вячеслав Жирковтар тэрээһин олус үчүгэйин бэлиэтээтилэр.

— Кыттар кэммитигэр икки күнү быһа сылаас миин, хортуоскалаах эт, плов сиэн абыранныбыт. Сыралаах күрэхтэһии кэмигэр сылаас аһынан үссэнии олус наада. Онон күүс-уох ылынарбытыгар бэртээхэй усулуобуйаны тэрийбиттэригэр тэрийээччилэргэ махталбыт сүҥкэн. Киин куоракка ыытыллыбыт үбүлүөйдээх «Аҕа күрэҕиттэн» олус астынан баран эрэбит, — диэн Вячеслав Жирков санаатын тиэртэ.

Данил Иванов «Синергия» кэллиэс 2-с кууруһун устудьуона тэрээһиҥҥэ волонтердаата.

— Кэбээйи улууһун Кэбээйи нэһилиэгиттэн төрүттээхпин. Үөрэхпит кыһатыттан 11 буолан волонтердуу сылдьабыт. Араас тэрээһиннэргэ кыттар буолан, номнуо уопутурдубут. Икки күн устата сүрүн эппиэттээх үлэбит — бэрээдэги көрүү. Кыттааччылар күрэхтэһэр кэмнэригэр дьон тоҕуоруһуутун таһаарыа суохтаахпыт. Уочаратынан кэлэн, сылаас минньигэс аһынан үссэнэ сырыттыбыт. Ханнык да тэрээһиҥҥэ аһаппаттар этэ. Онон тымныы күн буолан, үлэлиир усулуобуйабытын тэрийбиттэригэр истиҥ махталбытын тиэрдэбит, — диэн Данил Иванов санаатын үллэһиннэ.

… Ити курдук, үлэ уонна социальнай сайдыы министиэристибэтин иһинэн үлэлиир «Победа» ресурснай киин үлэһиттэрэ  тымныы тыаллаах күн үлэһиттэргэ, кыттааччыларга бэртээхэй усулуобуйаны тэрийэн, дьон кинилэргэ махтаныан махтанна.