«Аҕа-урбаанньыт» үөрэх бырайыагар сайаапканы тутуу саҕаланна

Саха сиригэр «Аҕа-урбаанньыт» диэн өрөспүүбүлүкэтээҕи үөрэх бырайыагар сайаапкалары тутуу саҕаланна. Бу бырайыак РФ Бэрэсидьиэнэ Владимир Путин көҕүлээбит «Көдьүүстээх уонна күрэстэһэр кыахтаах экэниэмикэ» диэн национальнай бырайыак чэрчитинэн олоххо киирэр.

Өрөспүүбүлүкэтээҕи «Мин биисинэһим» киин иһитиннэрбитинэн, бырагыраама кыттааччыларыгар биэс күн устата урбаанньыт буолуу сүрүн төрүттэригэр анаммыт дириҥэтиллибит тренинг ыытыллыаҕа. «Кыттааччылар уопуттаах эспиэрдэртэн тус консультацияны ылыахтара, ситиһиилээх урбаанньыттарга дьыалабыай сырыыларга кыттыахтара. Ону таһынан, 150 тыһыынча солкуобайдаах граны сүүйэр кыах бэриллэр. Бырагыраама бэйэ дьыалатын саҕалыан уонна урбаанньыт сатабылларын сайыннарыан баҕалаах дьоҥҥо анаан оҥоһулунна», – диэн бырайыак тэрийээччилэрэ кэпсээтилэр.

«Мин биисинэһим» кииҥҥэ чопчулаабыттарынан, үөрэх бырагырааматыгар биир эмит сааһын ситэ илик оҕолоох дьон уонна урбаанынан дьарыктанан саҕалаабыттара биир сылтан ордо илик саҥа саҕалыыр урбаанньыттар кыттыахтарын сөп.

Сайаапкалар бу сыл сэтинньи 23 күнүгэр диэри онлайн көрүҥүнэн бу сигэнэн тутуллаллар: https://forms.yandex.ru/cloud/69046144068ff0b80b625f93.

Санатан эттэххэ, бүгүҥҥү күҥҥэ Саха сиригэр аччыгый уонна орто урбаан эйгэтигэр 133 тыһыынчаттан тахса киһи үлэлиир. Кэлиҥҥи сылга урбаан субъектарыттан өрөспүүбүлүкэ бүддьүөтүгэр киирэр төлөбүр 30% үрдээн, 35 млрд солкуобайга тэҥнэстэ. 2025 сылга аччыгый уонна орто биисинэһи сайыннарыыга федеральнай уонна өрөспүүбүлүкэ бүддьүөттэриттэн 13,6 млрд солкуобайтан тахса үп-харчы туһуланна.