Кырдьаҕастарга, байыастар дьонноругар муус тиэйдилэр

Горнай улууһун Атамай нэһилиэгэр Дмитрий Аввакумов салайааччылаах «Аҕалар хоһууннара» диэн түмсүү дьоҥҥо-сэргэҕэ куруук көмөлөһөр, субуотунньуктарга тиһиктээхтик кыттар.

Бу күннэргэ кинилэр аҕам саастаахтарга уонна байыаннай дьайыы кыттыылаахтарын дьиэ кэргэттэригэр көмөлөстүлэр. Уопсайа 15 ыалга массыынанан муус тиэйдилэр.

Нэһилиэк олохтоохторо аҕалар түмсүүлэригэр махтанабыт. Кинилэринэн киэн туттабыт. Бука барыларыгар чэгиэн доруобуйаны, дьиэ кэргэттэргитигэр дьоллоох олоҕу баҕарабыт.

Валентина Яковлева,

Атамай, Горнай.

Дмитрий Аввакумов хаартыскаларга түһэриитэ