Халымаҕа аҕам саастаах балыксыты быыһаатылар

Бүгүн, ахсынньы 1 күнүгэр, Халыма көрдүүр-быыһыыр сулууспатын этэрээтигэр Крутой диэн Орто Халыматтан 18 км тэйиччи  учаастакка 89 саастаах балыксыкка көмө наадатын туһунан иһитиннэрии киирбит. Ол курдук, аҕам саастаах балыксыт сыҥааҕа тахсыбыт, суол суоҕунан кини быраастарга көмө ыла кэлэр кыаҕа суох буолбут.

Халыма оройуонун быыһыыр сулууспатын салайааччыта Алексей Тарасов иһитиннэрбитинэн, аҕам саастаах балыксыт ити учаастакка дьиэлээх эбит. Кини манна сааһын тухары олорбут, бар дьоҥҥо ытыктанар балыксытынан биллэр эбит. Халыма оройуонугар хаардаах тыал тохтоло суох түһэн айан сырыытын уустугурдубут.

Эмсэҕэлээбит киһиэхэ икки бураанынан түөрт быыһааччы көмөҕө кэлбит. Онон бүгүн, эбиэт саҕана аҕам саастаах балыксыты Орто Халыма балыыһатыгар аҕалыллыбыт. Бу туһунан СӨ Быыһыыр сулууспатын пресс-сулууспата иһитиннэрэр.