Аҕам саастаахтар Ньургуһун ыһыаҕын ыстылар

Share

Нэһилиэнньэни социальнай хааччыйыы кэлим киинэ уонна Үһүс оскуола быйыл 18-с төгүлүн Ньургуһун ыһыаҕын ыстылар. Манна аҕам саастаах дьон сахалыы сайбаччы таҥнан-симэнэн, киэргэнэн кэлэн, самаан сайыны көрсө үҥкүүлээн тэйдилэр, оһуохайдаан ойдулар, ырыа-тойук да дьиэрэйдэ. Кыһын устата оскуолаҕа тугу үөрэммиттэрин отчуоттаатылар.

Ааптар түһэриитэ.

Быйылгы үөрэх дьылыгар Үһүс саас оскуолатыгар 12,5 тыһыынчаттан тахса киһи кэлэн үөрэннэ. Бу баһаам ахсаан. Отуттан тахса араас хабааннаах куруһуок үлэлиир, ансаамбыллар тэриллэллэр. Кэрэхсэбиллээҕэ диэн, куруһуок салайааччыларынан волонтердар — сүрэхтэрин баҕатынан кэлэн үөрэтэр-такайар дьон үлэлииллэр.

Саамай сүрүнэ — манна аҕам саастаахтар дьоҕурдарын арыйар эрэ буолбатахтар, дьиэҕэ олорон, муунтуйан хаалбакка, үөлээннээхтэрин кытта ыкса алтыһаллар, көрсөллөр, саҥа доҕотторун булаллар, дьарыктаах буолан, санаалара көтөҕүллэр, доруобуйалара тупсар, үйэлэрэ уһуур. Онон улуустарга эмиэ филиаллар арыллан үлэлииллэр.

Курсаннары Үлэ, социальнай сайдыы миниистирин солбуйааччы Иннокентий Коротких эҕэрдэлээтэ:

Үһүс саас оскуолата өрөспүүбүлүкэ үрдүнэн тыһыынчанан аҕам саастаах дьону хабан үлэлиир. Олортон саамай көхтөөхтөрө эһиги, 300-тэн тахса киһи кэлэн тураҕыт. Олоххо тардыһыылаах, өрүү көхтөөх, эрчимнээх, үтүө, сырдык санаалаах буолаҥҥыт, эһигини холобур оҥостобут. Бу хамсааһын өссө сайдан, тэнийэн иһиэҕэ. Ил Дархан сорудаҕынан, Дьокуускайга Көхтөөх уһун үйэлэнии киинэ тутуллуоҕа, — диэн эппитин, ытыс тыаһынан көрүстүлэр.

Ньургуйаана Хаптасова хаартыскалара.

Нэһилиэнньэни социальнай хааччыйыы кэлим киинин дириэктэрэ Наталья Пахомова бу Үһүс саас оскуолатын тэрийбит киһи буолар. Кини:

Ньургуһун тоҥ буору тобулан тахсар ньургун күүстээҕин курдук, эһиги, аҕам саастаах дьон, олох очурдарын туораан, туохтан да толлубакка, ыччаты тэнитэн, сыраҕытын харыстаабакка үлэлээн, дьоһун олоҕу олорон кэллэххит. Ол иһин бу ыһыахпыт Ньургуһун ыһыаҕа диэн  ааттанар. Күөххэ этэҥҥэ үктэммиппитинэн истиҥ эҕэрдэ! Бу быйаҥ сайыҥҥа дуоһуйа сынньаныҥ, күүстэ-уохта эбиниҥ, аны күһүн Кырдьаҕастар күннэригэр көрсүөхпүт! — диэн эттэ.

Үһүс саас оскуола дириэктэрэ Пелагея Прядезникова быйылгы ситиһиилэрин кэпсээтэ. Ол курдук, үҥкүү ансаамбыла хас да өрөспүүбүлүкэтээҕи да, Арассыыйатааҕы да күрэстэргэ гран-при аатын ылбыт, хомусчуттар ансаамбыллара Арассыыйа куораттарынан сылдьан, саха хомуһун билиһиннэрбиттэр. Быйыл үлэ, социальнай сайдыы министиэристибэтиттэн субсидия көрүллэн, элбэх тэрээһиннэр үбүлэммиттэр. «Алмаасэргиэнбаан» бырайыагар кыттан, 100 тыһыынча солкуобайдаах грант ылан, «Незабудка» диэн саҥа бырайыагы олоххо киллэрбиттэр. Бу түөһэйиини сэрэтэр бырайыак. Маны тэҥэ, бу сайын аҕам саастаахтарга лааҕыр үлэлиэҕэ.

Ааптар түһэриилэрэ.

Ыһыахха Дьиэ кэргэн сылынан, 45, 48, 50 сыл бииргэ олорбут пааралары чиэстээтилэр. Оскуола көхтөөх курсааннарын, волонтердары наҕараадалаатылар.

Бу күн киэһээҥҥэ диэри кэнсиэртэр, күрэстэр, оонньуулар, оһуохай, алгыс, үҥкүү-битии оргуйан олордо. Ол быыһыгар ньургуһуннаах кырдалга хаартыскаҕа түһүү, түһүлгэлээн олорон саха мааны аһын амсайыы, үөлээннээхтэри кытта ирэ-хоро сэлэһии буолла. Онон 18-с төгүлүн ыытыллар Ньургуһун ыһыаҕа силигин ситтэ.

What’s your Reaction?
+1
7
+1
0
+1
0
+1
0
+1
0
+1
0
+1
0

Recent Posts

  • Култуура
  • Сонуннар

Улан ураты туругу бэлэхтээтэ

Муус устар 3 күнүгэр «Сэргэлээх уоттара» култуура киинигэр Василена Шарина-Улан «Турук» диэн бастакы моно-перфоманс кэнсиэрэ…

4 часа ago
  • Быһылаан
  • Сонуннар
  • Уопсастыба

Полицейскайдар биэнсийэлээх харчытын уорбут 18 саастаах уолу туттулар

Быйыл кулун тутар ыйга полицияҕа Дьокуускай куорат 77 саастаах олохтооҕо түөкүттэр сиэртибэлэрэ буолбутун уонна мөлүйүөн…

4 часа ago
  • Сонуннар
  • Уопсастыба

Дойдутун, норуотун туһугар (Гавриил Чиряев төрөөбүтэ 100 сылыгар)

Ханнык баҕарар дойдуга кыратыттан, улаханыттан тутулуга суох, төрөөбүт-үөскээбит сирин дьонун-сэргэтин дириҥ ытыктабылларын ылбыт, киэн туттуулара…

5 часов ago
  • Сонуннар
  • Спорт

Оскуола спартакиадатын финала Дьокуускайга бэс ыйыгар ыытыллыаҕа

Бэс ыйын 4-8 күннэригэр Дьокуускайга «Спортивные якутяне» Саха сирин үөрэнээччилэрин спартакиадатын финальнай түһүмэҕэ ыытыллыаҕа. Бэлэмнэнии…

5 часов ago
  • Сонуннар
  • Уопсастыба

ОМОН «Бизон» этэрээт тэриллибит күнүгэр үрдүк наҕараадалар туттарылыннылар

Росгвардия территориальнай управлениетын ОМОН баазатыгар «Бизон» этэрээт тэриллиитин күнүгэр үөрүүлээх тэрээһин буолан ааста. «Бизон байыастарын…

5 часов ago
  • Сонуннар
  • Хаартыска/Видео

«Сэмсэ тыл»: Трамп тоҕо түһээнин үрдэтэрий, тоҕо ороскуотун аҕыйата сатыырый?

Ис-тас атыы-эргиэн арыта аһара баран, аны дуоллар тиһигэ туллаҥнаан Эмиэрикэлэр экэнэмиэкэлэрин "эргичитэллэр".  

6 часов ago