Аҕам саастаахтарбыт үтүө холобуру көрдөрөллөр

«Кырдьаҕаһы хааһахха хаалыы сылдьан сүбэлэт, эдэртэн эйэтин ыл» диэн өс хоһооно этэринии, биһиги Харбалаахпытыгар аҕам саастаах дьоммут куруук эдэрдэргэ сүбэ-соргу буолаллар, нэһилиэк олоҕор көхтөөхтүк кыттан, үтүө холобур буолаллар.

Оннооҕор дэриэбинэни ыраастааһын субуотунньуктарыгар биир бастакынан кинилэр кэлэллэр. Харбалаахха баар «Эбээлэр», «Кэллиэксийэньиэрдэр» түмсүүлэрэ оҕо аймаҕы кытта куруук бииргэлэр. Араас тэрээһиннэргэ кэлэн, Ийэ дойдуга бэриниилээх буоларга, төрөөбүт дойдуну таптыырга-ытыктыырга үөрэтэн, кэс тылларын тиэрдэллэр.

Бу күннэргэ оскуола бары үөрэнээччилэрэ нэһилиэк ытык кырдьаҕастарыгар тиийэн,  «Ытык саастаахтар күннэринэн» эҕэрдэлээтилэр, сэмэй бэлэхтэрин туттардылар, ырыа-хоһоон ааҕан сэргэхситтилэр. Ким көмөҕө наадыйарга күүс-көмө буоллулар.

Ити курдук, аҕа саастаахтарга ытыктабыл, өйөбүл ситимин быспакка куруутун баар буоллун! Аҕам саастаахтарбыт үтүө холобур буолан, ыччат дьону үтүөҕэ, кэрэҕэ сирдии туруохтара!

Валентина КРИВОШАПКИНА,

Таатта, Харбалаах