Хаартыска Нина Саввина тиксэриитэ.
Нам улууһугар Аппааныга дьон-сэргэ доруобуйатын тупсарынарыгар, чэгиэн, чөл буоларыгар, толкуйдуур дьоҕурун сайыннарарыгар үлэ тиһиктээхтик ыытыллар.
Бу туһунан биһиэхэ Нина Саввина суруйар:
—Кэнники кэмҥэ эрдэ кырдьыыны, мэйии үлэтин бытаарыытын, илии-атах быччыҥнара мөлтөөһүнүн хайдах эрчийэн бэйэни көрүнүөххэ сөбүн туһунан социальнай ситиминэн араас элбэх научнай өрүттээх ыстатыйалар, сүбэлэр, эрчиллиилэр кэлэллэр. Ол гынан баран, киһи дьиэҕэ олорон иллэҥ буолан, бириэмэ аттаран сатаан дьарыктаммат.
Маныаха Хатыҥ Арыы нэһилиэгин бэтэрээннэрин салайар түмсүүтэ мунньахтаан, сүбэлэһэн баран, дьоҥҥо табыгастаах буоларын курдук дьарыктар хаһан ыытыллалларын толкуйдаатылар. Нэдиэлэ күннэринэн аттаран, сынньалаҥҥа олорор аҕам саастаах уонна дьарыгы тэрийэн ыытыан сөптөөх дьоннору кэпсэтэн, дуобакка, саахымакка, хаамыскаҕа, хабылыкка, ырыаҕа, иискэ дьарыктар ыытыллаллар. Иис уонна ырыа дьарыктара уруккуттан ыытыллыбыт буоллахтарына, араас интэриэстээх дьону хабар сыаллаах көрүҥнэрин кэҥэттилэр.
Хабылык, хаамыска анал ирдэбилгэ сөп түбэстин диэн, түмсүү салайааччыта Лебедева О.И. Уус Алдан ууһугар анаан үлэһэн оҥоттордо. Онон олохтоохтор үөрүүбүт улахан. Нэһилиэгин аҕам саастаахтарыгар чахчы ис дууһатыттан кыһаллан үлэлиир салайааччыбытыгар махталбыт улахан. Маныаха оҕолор, ыччаттар кэлэн аҕам саастаахтары кытары дьарыктаналлара, күрэхтэһэллэрэ биһирэнэр. Бу эдэрдэр кырдьаҕастарга болҕомтолоохторун, кыһамньыларын ууралларын көрдөрөр. Ону сэргэ, остуол оонньууларыгар: хабылыкка, хаамыскаҕа билэр-көрөр, урут оонньообут ытык дьонтон үөрэнэллэрэ хайҕаллаах.
Хабылык, хаамыска дьарыктарын ыытааччынан 80 саастаах Клавдия Петровна Носкова буолар.
Кини нэһилиэк, улуус иһигэр ыытыллар остуол оонньууларын хас да төгүллээх кыайыылааҕа. Онтон дуобат, саахымат дьарыктарын бочуоттаах сынньалаҥҥа олорор I разрядтаах дуобатчыт Анисья Васильевна Эверстова салайар.
Нина Саввина,
Аппааны, Нам.
Хаартыскалар Нина Саввина тиксэриилэрэ
Карл Георгиевич Башарин олоххо таптала “Саха киэн туттар дьоно” сиэрийэнэн тахсыбыт “Карл Георгиевич…
Күн-дьыл билгэтэ. Быйыл кыһын сылгы сотору-сотору хахсыйарын, эбэтэр ойуурга киргил торулуурун иһиттиҥ дуо? Хатааһыннаах саас…
Ил Дархан Айсен Николаев Арассыыйа Наукаларын Академиятын бэрэсидьиэнэ Геннадий Красниковы кытта көрүстэ. Көрсүһүүгэ РНА вице-бэрэсидьиэнэ…
Бу бырагырааманы үбүлээһин үс хайысханан оҥоһуллар: федеральнай, Саха Өрөспүүбүлүкэтин судаарыстыбаннай уонна муниципальнай тэриллиилэр олохтоох бүддьүөттэриттэн.…
Аныгы технологиялаах "Смарт" бибилэтиэкэҕэ робот-бибилэтиэкэр баар буолла. Робот сахалыы саҥарар, дорооболоһор, төбөтүн имэрийдэххэ, манньыйан хараҕын…
Бу күннэргэ күн-дьыл туруга хайдах эбитий? Күнү-дьылы кэтээн көрөөччүлэр туох дииллэрий? Хотугулуу-илин намыһах сирдэргэ -48-53°,…