АГАТУ ипподромун 90 сыла уонна «Уһук Илин бирииһэ»

Бу күннэргэ Дьокуускайга Арктическай судаарыстыбаннай агротехнологическай университет (АГАТУ) ипподромугар устуоруйаны, успуорду уонна култуураны түмпүт улахан бырааһынньык буолан ааста. Сүүһүнэн көрөөччүлэр чаҕылхай атынан сүүрүүлэри, кэрэ-бэлиэ кэнсиэр нүөмэрдэри уонна үөрүүлээх наҕараадалааһын сиэрин-туомун туоһулара буоллулар, диэн АГАТУ пресс-сулууспата иһитиннэрэр.

Үбүлүөй чэрчитинэн Саха сирин араас улуустарыттан уонна Бурятияттан барыта 40 ыраас хааннаах ат стартка таҕыста. Кыттааччыларга араас дистанцияҕа аҕыс сүүрүү ыытылынна. Ону таһынан, устуоруйаҕа аан бастаан понилар күүстэрин холоннулар. Кинилэри эдэр жокейдар сүүрдүбүттэрэ.

«90 сыл диэн бэлиэ даата. Бу үгэһи бэлиэтээн, биһиги маннык улахан ат успуордун бырааһынньыгын тэрийдибит. Биһиэхэ устуоруйаҕа аан бастаан Уһук Илин дерби-сүүрүүтэ ыытылынна, ону таһынан 8 сүүрүү буолла. Бу барыта – биһиги Сахабыт сиригэр ат успуордун бары көрүҥнэрин сөргүтүүтэ буолар», — диэн кэпсээтэ СӨ Ат успуордун Федерациятын бэрэсидьиэнэ Эдуард Рехлясов.

Үбүлүөйдээҕи сүүрүүлэргэ жокейдар бөдөҥ харчынан бириистэр иһин күрэхтэстилэр. Бириис уопсай пуондата  — үс аҥаар мөлүйүөн солкуобай. Бырааһынньык бырагырааматынан алгыс сиэрэ-туома ыытылынна, өрөспүүбүлүкэ уонна АГАТУ салайааччыларын эҕэрдэ тыллара этилиннилэр. Этно-фолк ансаамбыллар уонна артыыстар эҕэрдэ нүөмэрдэрин көрдөрдүлэр. Ону таһынан көрдөрүүлээх нүөмэрдэр буоллулар – ат үрдүттэн оҕунан ытыы, аты ыстаннарыыга конкур.

Сүүрүү түмүктэрэ:

1-гы сүүрүү (1600 м, АГАТУ ректорын Куубага):

1. Деленджер (Ньурба) – 1.41.24;
2. Суматра (Горнай) – 1.43.41;
3. Цертон (Сунтаар) – 1.43.98.

2-с сүүрүү (1800 м, Н.И. Пинигин аатынан бириис):

1. Чөмчүүк (Мэҥэ-Хаҥалас) – 1.58.89;
2. Вальта (Амма) – 2.01.01;
3. Кешбэк (Нам) – 2.01.15.

3-с сүүрүү (1800 м, маастар-жокей С.С. Лиханов чиэһигэр бириис):

1. Партия (Сунтаар) – 1.58.60
2. Батл Мэн (Үөһээ Бүлүү) – 1.59.94
3. Талбан (Мэҥэ-Хаҥалас) – 1.59.94

4-с сүүрүү (2400 м, М.Г. Пупко аатынан бириис):

1. Гектор (Бурятия);
2. Граф Калиостро (Амма);
3. Заветный (Амма).

5-с сүүрүү (2400 м):

1. Аутлендер (Нам) – 2.37.94;
2. Бумер (Уус-Алдан) – 2.38.31;
3. Атлант Барс (Амма) – 2.38.60.

6-с сүүрүү (2400 м, Уһук Илин Дерби бирииһэ):

1. Иссад (Үөһээ Бүлүү) – 2.39.04;
2. Таргариан (Ньурба) – 2.40.54;
3. Формигал (Забайкальскай) – 2.41.82.

7-с сүүрүү (4800 м, М.В. Стиникова, Г.И. Шадрин ааттарынан бириис):

1. Дохсун (Сунтаар) – 7.02.87;
2. Сулус (Нам) – 7.18.78;
3. Харачаас (Хаҥалас) – 7.28.58.

8-с сүүрүү (200 м, пониларга):

1. Валенсия – 8.01;
2. Лепший – 8.80;
3. Энерджи – 9.06.

Бу күн умнуллубат үөрүүнү-көтүүнү бэлэхтээтэ, оттон кыайыылаахтар үтүө наҕараадаларын илдьэ бардылар. Ол эрээри бырааһынньык сүрүн кыайыылааҕынан АГАТУ ипподрома бэйэтэ буолла – 90 сыллаах устуоруйа уонна саҥа кыайыылар.