АГАТУ устудьуоннара гуманитарнай көмөнү бэлэмнииргэ күүс-көмө буолаллар (ВИДЕО)

Арктикатааҕы судаарыстыбаннай агротехнологическай университет Технологияҕа уонна управлениеҕа кэллиэһин лабораториятыгар устудьуоннар уонна преподавателлэр байыаннай дьайыыга барыахтаах аһы-үөлү, чуолаан, куһу-хааһы, куобаҕы, улары астаан бэлэмнииллэр.

Кэллиэс устудьуоннара нэһилиэнньэттэн хомуллубут аһы, астаан, ыйаан, суулаан бэлэмнээн иһэллэр. Ол курдук устудьуоннар настаабынньыктар салайыыларынан астааһын бастакы уонна иккис түһүмэҕэр үөрэнэллэр.

Бу күннэргэ эмиэ Үөһээ Бүлүү улууһуттан булчуттар уонна балыксыттар хомуйбут астарын астаан, нобуор оҥорон бэлэмнээн, байыаннай дьайыыга баһыылкалары ыытар дьоҥҥо туттардылар. Бу астар байыаннай дьайыыга сылдьар байыастарбытыгар уонна госпиталларга эмтэнэ сытар уолаттарыбтыгар тиэрдиллиэхтэрэ.

«Маннык практическай үөрэх устудьуоннарга ордук тиийимтиэ уонна көдьүүстээх. Ону таһынан Ийэ дойдуну көмүскээччилэргэ өйөбүл, бэйэ-бэйэҕэ үтүө сыһыаны олохтооһун буолар. Маннык үтүө дьыалаҕа кыттыһар бар дьоммутугар махтанабыт. Биһиги мэлдьи көмөлөһө туруохпут. Аҕа дойдубутун көмүскээччилэрбитин өйүөххэ!» — диэн Арктикатааҕы судаарыстыбаннай агротехнологическай университет үлэһиттэрэ санааларын үллэстэллэр.